Социал соруулагъа аслам эс бёллюкдюле

Къабарты-Малкъарны Жамауат палатасындан билдиргенлерича, республиканы Урунуу эм социал къоруулау министерствосунда Жамауат совет быйыл ахыр жыйылыуун бардыргъанды. Анда социал келишимле, аналыкъ капиталны хайырланыу, жашыртын урунуу эм улутхачылыкъгъа къажау мадарла бла байламлы соруулагъа къаралгъанды.

Ахыр эсеплеге кёре, социал келишимни хайыры бла былтыр - 191, быйыл а къыйын жашау болумгъа тюшген 279 юйюр кеслерини ишлерин ачхандыла. Бу мадарны баш мураты инсанлагъа, чурумладан къутулуп, мюлк-файда бла кеслерин жалчытып башларгъа болушууду. Эл мюлк регион болгъаныбыз ючюн, кёпле бу жаны бла айныргъа сюйгендиле, келишимни болушлугъу бла ала малла, юй къанатлыла алып жаядыла, бахчачылыкъ бла да кюрешедиле. 

2026 жылны 1 январындан социал келишимни СВО-ну  ветеранларына деп жарашдырылгъан энчи кесеги ишлеп башларыкъды, аны бла Иш бла жалчытыу арада эсепге тургъан, сора «Ата журтну къоруулаучулары» къырал фонддан къагъытлары болгъан ветеранла неда аланы юйюрлерини келечилери хайырланаллыкъдыла. Эсигизге салайыкъ, социал келишим адам кёп жылланы ичинде ишинден файда алырча этерге болушхан амалды. Анга, башхача, къыйын жашау болумдан чыгъаргъа эмда файданы ёсдюрюрге болушхан эм юйретген «жол карта» дерге да боллукъду.

Ызы бла жыйылыуда беш эм андан кёп сабий ёсдюрген юйюрлеге турмуш болумларын тюзетирча регион аналыкъ капиталны бериуню юсюнден соруу кётюрюлгенди. Аны юй неда фатар алыргъа, юйню къурулушуна неда ипотеканы тёлеуге жояргъа боллукъду. 2008 жылны 1 январындан 2023 жылны 31 декабрине дери туугъан бешинчи сабийге ол 250 минг сомду, бешинчи балалары 2024 жылны 1 январындан туугъанлагъа уа 500 мингди. Аны себеплиги бла 2025 жылда жашау-турмуш болумларын 149 кёп сабийли юйюр игилендиргендиле.

Жашыртын иш бла жалчытыу, айлыкъны конвертледе тёлеу да энчи эс излейдиле. Жыйылгъанла оюм этгенлерича, бу халда ишлеуню азайтыуну халкъгъа саулай да магъанасы уллуду, нек дегенде официал халда урунуу бла айлыкъны тёлеу республикалы, жер-жерли бюджетлеге да файдалыды. Эсеплеге кёре, 2025 жылны 1 декабрине жашыртын ишлерин 6 737 инсан тохтатхандыла.

Ахырында жамауат совет 2026 жылда да бардырлыгъы, социал магъаналы соруула бла кюрешириги билдирилгенди.