Къууанч, ёхтемлик да берген такъыйкъала

Бу кюнледе «Жигитлени тёлюлери» деген форумну чеклеринде окъуучулагъа усталыкъ сайларгъа болушур муратда талай жумуш бардырылгъанды. Право низамны сакълаучу органлада къуллукъ этиуню юсюнден билирге сюйгенлеге КъМР-ни прокуратурасында, КъМКъУ-ну право, экономика эмда финансла институтунда, КъМР-де Ич ишлени министерствосунда, РФ-ни Следствие комитетини КъМР-де следствие управлениясында, Монополиягъа къажау федерал службаны регион управлениясында тюбешиуле къуралгъандыла.

Медицинагъа сейирлери болгъанла уа КъМКъУ-ну Стоматология эмда жаякъ-бет хирургияны институтунда, медицинаны академиясында, КъМР-ни Саулукъ сакълау министерствосунда бла аны оноуунда болгъан учрежденияларында тюбешгендиле.

Маданиятны бла дизайнни сайлагъанлагъа Дизайн колледжде, Искусстволаны Шимал-Кавказ къырал институтунда, КъМР-ни Маданият министерствосунда бла Мадина Саральпны чыгъармачылыкъ мастерскоюнда ушакъла бардырылгъандыла.

Журналистика, IT-технологияла эм цифралы амалла бла жашауларын байламлы этерге муратлары болгъанла  цифра технологияланы халкъла аралы «ИТ ХАБ Нальчик» академиясында, КъМКъУ-ну Социал гуманитар институтунда, КъМР-ни Цифралы айныу, связь эмда асламлы коммуникацияла министерствосунда  бла ВГТРК-ны филиалында экскурсияла къуралгъандыла.

Билим бериу жаны бла КъМКъУ-ну Педагогика, психология эм физкультура-спорт жаны бла билим бериу институтунда бла КъМР-ни Жарыкъландырыу эмда илму министерствосунда тюбешиуле болгъандыла.

Форумгъа келген окъуучула алгъаракълада сайлагъан усталыкъларында окъутуу иш къалай къуралгъаны бла шагъырейленнгендиле, сорууларына жууапла тапхандыла.

Тюшден сора аланы барын да бютюн сейир программа сакълай эди. Жаш тёлюню ишлерини министерствосу алагъа экскурсияла къурап, республикада жашагъанла кеслерини чыгъармачылыкъ итиниулерин жашауда бардыргъан мастерскойланы кёргюзтгендиле.

СКГИИ-де да окъуучула чыгъармачылыкъ араны иши бла шагъырей болургъа онг тапхандыла. Институтда ишлеген адамла бу мастерскойгъа къуруда СКГИИ-де окъугъанла келмей, битеу сюйген адамла да сайтда (artideaskgii.ru) жазылып, мында болгъан затла бла ишлерге боллукъдула.

Ызы бла «Жигитлени тёлюлери» деген форумгъа келген жаш адамла КъМР-ни Башчысында сабийлени бла жаш тёлюню «Биринчилени атламлары» битеуроссей къымылдау бла байламлыкъла къурагъан советни жыйылыууна къатышхандыла.

Алагъа чакъырыу сёзлерин КъМР-ни Башчысы Казбек Коков айтханды: «Бек алгъа Россей Федерацияны Президенти Владимир Путинни жаш тёлюню «Биринчилени атламлары» битеуроссей къымылдауну къурау жаны бла башламчылыгъыны уллу стратегиялы магъанасы болгъанын чертирге сюеме. Аллай оноу ёсюп келген жаш тёлюню юйретиу эм алагъа билеклик этиу жаны бла жумушланы бир ызгъа салыргъа болушханды. Биз бюгюн аллай жумушну бардырабыз. Аны бла байламлы бизни жаш тёлюбюзню регион командасына, къымылдауну активине, жаш тёлю къырал политиканы жашауда бардырыргъа болушхан коллегаларыма жюрек ыразылыгъымы билдиреме».

Доклад бла жаш тёлюню ишлерини министри Азамат Люев сёлешгенди. Ол республиканы толтуруучу власть органлары, жамауат биригиулери «Биринчилени атламлары» деген битеуроссей къымылдауну башламчылыкъларын жашауда бардырыргъа болушханларыны юсюнден айтханды.

«Бизни министерствобуз «Биринчилени атламлары» къымылдауну проектлерине болушлукъгъа 10 миллион сом бергенди», – дегенди министр.

Бу къымылдауну регионда бёлюмюню советини председатели Аслан Шипшев да сёлешгенди. Ол 2025 жылда «Биринчилени атламлары» къуралгъанлы юч жыл толгъанын айтханды. Къысха заманны ичинде аны санына 84 мингден кёп адам къошулгъанларын, 297 бёлюмлери къуралгъанларын да билдиргенди.

«Хурметли коллегаларым, бизни быйылны ичинде жетишимлерибизге жетерге къырал власть органланы, ведомстволаны, жамауатны бирикгени болушханды. Биз барыбыз да бир болсакъ, битеу ахшы умутларыбызны толтураллыкъбыз!» – дегенди ол.

Казбек Коковну аллында жаш тёлюню эки командасы кеслерини башламчылыкъ проектлерини юслеринден билдирирге онг тапхандыла. Биринчи команда «Жигитлени ауазларын эшитигиз» деген проектни хазырлагъанды. Сынаулу журналистле мастер-классла къурап, жаш адамланы бу ишге кёллендиргенден сора, проектге къатышханла энчи аскер операциягъа къатышханла бла интервьюла бардырып, аланы жаш тёлюге эшитдирирге мурат этедиле.

Экинчи команда уа «Жигитни анасына жюрегинги саугъа эт» деген проектни жарашдыра турады. Ала аллай аналаны юслеринден фильм алыргъа муратлыдыла. Алагъа  тынгылагъандан сора, Казбек Коков алагъа кеси болушургъа айтханды.

Жыйылыуну ахырында форумгъа къатышханла республиканы Башчысына соруула бергендиле эм алагъа тынгылы жууапла алгъандыла. Казбек Коковха «Жигитлени тёлюлери»  форумгъа къатышыргъа онг бергени ючюн ыразылыкъларын билдиргендиле.