Адамланы эркинликлери дайым да сакъланырча

Къабарты-Малкъарны Жамауат палатасында болгъан жыйылыуда тюрмеледе олтургъанланы эркинликлерин сакълау, алагъа документлени алыуда, иш излеуде, эркинликлери сыйырылгъан кезиуде тургъан жерлерин белгилеу бла байламлы тилеклери къалай толтурулгъанлары сюзюлгенди. Анга палатаны, Аманлыкъчыланы терсликлерине жолукъдуруу федерал службаны регионда управлениясыны (УФСИН) бла Жамауат-къараучу комиссияны (ОНК) келечилери къатышхандыла.

Жыйылыуну ача, палатаны жамауат къоркъуусузлукъ, законлукъну сакълау эмда ОНК бла байламлыкъла жюрютюу жаны бла комиссиясыны башчысы Къараланы Расул айтханыча, республикабызда аманлыкъчылыкъгъа къажау кюрешни бардырыугъа эмда тюрмеде олтуруп чыкъгъанла жангыдан осал ишлеге къайтмазча мадарла этиуге аслам эс бурулады. Аны бла байламлы тутмакъланы жамауат жашаугъа тюзетиуню, аланы социал реабилитацияларын бардырыуну магъанасы да ёседи. Урунуу эмда социал къорууланыу министрни орунбасары Анатолий Шетов билдиргеннге кёре, «Тюрмеледен чыкъгъан адамланы социал жашаугъа тюзетиу, аланы социал реабилитацияларын бла адаптацияларын бардырыу» жаны бла регион программа ведомствола аралыды, анга адамланы бу къаууму артда социал жашауда жерлерин табарча мадарла битеулю халда этиледиле. 

Прокуратураны уголовный аманлыкъчыланы терсликлерине жолукъдурууда законлукъну сакълау жаны бла бёлюмюню прокурору юстицияны тамата кенгешчиси Асланбек Гашаев айтханнга кёре, 2025 жылда ресолиацияда болушлукъ алырча тутмакъладан 93 тилек келгенди, ол а быллай тилек жиберирге эркинликлери болгъанланы 13,69 процентиди. Аладан 83-сю къабыл кёрюлгенди, онусуна къарала турады. Психология жаны бла болушлукъ излеп, социал-право соруула, эркинликлерин жалчытырча документлени сурап, иш табаргъа, медицина болушлукъ алыргъа себеплик тилегенле да асламдыла, дегенди ол.

Сюд приставланы федерал службаларыны управленияларыны право жалчытыу, контроль-надзор ишни тамамлау жаны бла бёлюмюню башчысы Къазийланы Марина аланы ишлеринде энчи магъана аманлыкъ ишни хатасы жетгеннге ол къоранчны неда заранны кетериуге бёлюннгенин, управленияны башчылары аны кеслерини энчи къарауларында тутханларын айтханды.

УФСИН-ни башчысыны орунбасары Рита Текаева да управленияда кётюрюлген соруулагъа аталгъан жыйылыула аслам къуралгъанларын, ОНК бла тюбешиуде да алагъа эс бурулгъанын белгилегенди. Октябрьни  эсеплеге кёре, управлениягъа 3549 тутмакъдан ресоциализацияда болушууну юсюнден тилек келгенди, аладан 3525-не къаралгъанды. Толтуруучу пробацияны юсюнден тилеклерин уголовный-толтуруучу инспекцияда эсепде болгъан 237 адам жибергендиле, аладан экисини тилеклери къабыл кёрюлмегенди, бириники тинтиле турады, 234-ню тилеклери уа дурус кёрюлгендиле. Тамамлагъан ишлерини юсюнден Къабарты-Малкъарда Адамланы эркинликлери жаны бла уполномоченныйни аппаратыны башчысы Анзор Тлепшев да билдиргенди.        

Ахырында Къараланы Расул пробацияны чегинде социал эм юйретиу ишни бардырыргъа, терсленнгенлени борчлу халда ишлеге къатышдырыргъа неда эркинликлерин сыйырыргъа, алагъа психология болушлукъ этерге эмда социал жашаугъа тюзелирге болушуу да киргенлерин чертгенди. Жыйылыуну эсеплерине кёре сейирлери болгъан органлагъа бла ведомстволагъа эсгертиуле жарашдырылгъандыла.