Парламент: Кемчиликлени ачыкълагъандыла, аланы кетерниу амалланы сюзгендиле

КъМР-ни Парламентини  Экономика  политика, инновация айнытыу, туризм  эм предпринимательство жаны бла комитетини кенгертилген жыйылыуунда реклама бла байламлы объектлени хайырланыуну сорууларына къаралгъанды.  

Тюбешиуге Парламентни башчысыны орунбасары Мурат Карданов, депутатла, Жамауат палатаны,  прокуратураны, КъМР-де предпринимательлени эркинликлери жаны бла уполномоченныйни, КъМР-ни сатыу-алыу-промышленный палатасыны, муниципал районланы   келечилери къатышхандыла.

Комитетни башчысыны орунбасары   Алексей Войтов, кенгешни ача, реклама бла байламлы сферада болгъан кемчиликлени юслеринден айтханды. Ол жыйылгъанланы ачыкъ ушакъ бардырып, болумну тынгылы сюзерге, кемчиликлени кетериуню амалларын белгилерге чакъыргъанды. 

РФ-ни Монополиялагъа кажау федерал службасыны КъМР-де Управлениясыны башчысы Анна Кумахова, доклад бла сёлеше, РФ-ни правительствосуну буйрукъларына кёре, ведомствону къуллукъчулары реклама жаны бла законла къалай толтургъанларына контрольну къатыландыргъанларын чертгенди. Бардырылгъан тинтиуледен сора жер-жерли администрациялада реклама объектлени законсуз орнатыуну тохтатыуну сорууларына аталгъан кенгешле бардырылгъандыла.

Анна Кумахова жер-жерли администрацияла, законлагъа тийишлиликде, сайтларында реклама конструкцияла къалайда  орнатылгъанларын басмаламасала,   конкуренциягъа чырмаула этилгенлерине эс бургъанды.

Сёз  республиканы районларыны власть органлары бла монополиялагъа къажау законланы чеклеринде къуралгъан байламлыкъланы юслеринден да баргъанды.  Анна Валентиновна айтханыча, муниципал къуралыула ачыкъланнган кемчиликлени кетериу жаны бла жумушла къалай толтурулгъанларын ай сайын билдиредиле.

Орта эм гитче предпринимательствону «Опора России» битеуроссей жамауат организациясыны регион бёлюмюню башчысыны орунбасары Роман Арамисов  а рекламаны орнатхан кезиуде жорукълагъа этилген бузукълукъланы, башха регионланы сынауларыны эмда законлагъа кийирирге керекли тюзетиулени юслеринден айтханды.

Сюзюлген  соруугъа  кёз къарамын КъМР-ни Башчысыны Администрациясыны ич политика эм жер-жерли самоуправленияны соруулары жаны бла управлениясыны кенгешчиси   Мурат Бжедугов да билдиргенди. Ол социал рекламаны, муниципал районлада  къырал байрамланы юслеринден реклама объектлени орнатыуну, жеринде власть органланы бла рекламаны хазырлагъанланы араларында байламлыкъланы юслеринден айтханды.

Докладланы сюзе, депутатла рекламаны качествосуну, республикада быллай объектлени картасын къурауну, рекламаны хазырлагъанда тыш къыраллы тиллени хайырланыуну, туристле кёп болгъан жерледе реклама объектлени халларына энчи эс бурургъа, сыныкълары болгъанланы алышыргъа кереклисини юслеринден айтхандыла.

Кенгешни ахырында профильли комитетни башчысы Заур Апшев ушакъ хайырлы болгъанын, аны кезиуюнде этилген эсгертиуле бла башламчылыкъла бу сферада ишлегенлеге магъаналы  болгъанларына ышаннганын айтханды.

Жыйылыуну ахырында жууаплы органлагъа тийишли эсгертиуле къабыл кёрюлгендиле.