Поэзияны бирикдирген кючю

Ингушетияны Ч.Ахриев атлы илму-излем институтунда КъМР-ни, КъЧР-ни да халкъ поэти, РСФСР-ни М. Горький атлы Къырал саугъасыны лауреаты Зумакъулланы Мустафаны къызы Танзиляны чыгъармачылыгъына аталгъан ингир къуралгъанды.

Зумакъулланы Танзиля – сау ёмюрню, заманны эм кенгликлени ичлеринде халкъланы бирикдиралгъан тин эм поэтика закийликни бир белгисиди.

Ингирни Ингушетияны илму-излем институтуну таматасы Джамбулат Оздоев ачханды. Ол Зумакъулланы Танзиляны миллет маданиятны бла адабиятны айныуларына салгъан магъаналы къыйынын чертип айтханды. Андан сора да, ол поэтни назмулары терен магъаналы болгъанларын, ёз жерге сюймекликден толгъанларын, ала жазыучуланы жангы тёлюлерин ёхтемлендиргенлей тургъанларын да белгилегенди.

КъМР-ни Жазыучуларыны союзуну таматасы Байтуугъанланы Исмайыл Танзиля Мустафаевна жылыулу сёзлерин эмда ыразылыгъын билдиргенин айтып, аны закийлигини, намыслылыгъыны, сабырлыгъыны эмда адабиятха чексиз кертилигини юсюнден сёлешгенди.

Ингир жылыулу халда озгъанды. Зумакъулланы Танзиляны назмулары башха-башха тилледе эшитилгендиле, шайырны таныгъанла, аны фахмусуна табыннганла да кеслерини жюрек сёзлерин туура этгендиле.

Жыйылыугъа Ингушетия Республиканы Жазыучуларыны союзуну таматасы Хаваш Накастоев, «Литературная Кабардино-Балкария» журналны жууаплы секретары Пётр Хатуев, «Минги-Тау» журналны баш редактору Додуланы Аскер, поэтле, жазыучула да къатышхандыла.  
Жыйылыу кавказ халкъланы бла поэтикалы сёзню ёмюрлюк байламлыкъларыны кючюню ариу шагъатлыгъы болгъанды.