Къутхарыучуланы кюнлери тынгысыздыла

Быйыл декабрьде Огъары Малкъарда от тюшюуге къажау-къутхарыу 16-чы бёлюм ишлегенли 20 жыл толгъанды. Бу жылланы ичинде анга таматалыкъны Огъурлуланы Алик, Таумырзаланы Ибрагим, Гызыланы Мухаммат, Байсыланы Алим, Цийкъанланы Зейтун, Батчаланы Эльдар этгендиле. Бюгюнлюкде уа къутхарыучулагъа таматалыкъны Сарбашланы Алим этеди.

16-чы бёлюмню юбилейине аталгъан къууанчлы жыйылыуда службаны башчысы Анзор Карданов эм аны орунбасары Арсен Жилоков от ёчюлтюучюлени алгъышлагъандыла эм мындан ары да борчларын толтурууда жетишимле тежегендиле. Байрам ишлеге Черек районну башчысыны болушлукъчусу Байсыланы Харун, Огъары Малкъарны администрациясыны таматасы Чаналаны Мусса да къатышхандыла.

Юбилей бла байламлы 16-чы бёлюмню къуллукъчулары Геляланы Харун, водительле Герузланы Анзор бла Гуппойланы Мурат, диспетчерле Таубулатланы Мухамед, Темуккуланы Алим эм Хозаланы Мурат    Къабарты-Малкъарны от тюшюуге къажау-къутхарыу службасыны Сыйлы грамотасы бла саугъаланнгандыла.

От ёчюлтюучюле Огъары Малкъарда юйлени, чекчи заставаны эмда Мухол-ГЭС-ни от тюшюуледен сакълагъанларын айтырчады. Бу ишде алагъа  энчи машинала уллу болушлукъдула - «ЗиЛ-131».   

Огъары Малкъар къуру Къабарты-Малкъарда угъай, битеу Россейде да кесини от ёчюлтюучю бёлюмю болгъан жангыз элди. 16-чы бёлюмню къуллукъчулары уа ишлерини профессионалларыдыла. Анга ала тамамлагъан ангылатыу жумушланы хайырындан ахыр он жылны ичинде элде бир от тюшюу да болмагъаны шагъатлыкъ этеди. Ахыр 20 жылны ичинде уа аллай къаугъалада бир адам да ачымагъанды неда ауушмагъанды.

2014 жылда жауунланы хатасындан Огъары Малкъаргъа жолну бир-бир жерлерине ырхы тюшгенди, суу жолну ашагъанды. Ол кезиуде «Уштулу-Урван» жолну 40 метри машина ётмезча ахырда жараусуз чекге жетгенди. Газ эм ток ызла юзюлюрге къоркъуу уллу болгъанды. Табийгъат хатаны кетериуге Черек районну битеу энчи службалары къатышхандыла, аланы арасында 16-чы бёлюмню от ёчюлтюучюлери да.

Тапландырыу ишлени бардырыргъа жауун уллу чырмау этгенди. Болсада экинчи кюн ингирде машинала эм адамла ётерча, эллилеге, район арагъа барып, юйге къайтырча амалла къуралгъандыла.

От ёчюлтюучюле салыннган борчланы бийик даражада толтурадыла, аны бла бирге уа усталыкъларын сынагъан конкурслада, спорт эришиуледе алчыла боладыла. Арт тёрт жылны ичинде «Къабарты-Малкъарны от тюшюуге къажау-къутхарыу службасыны физический хазырлыкъ жаны бла от тюшюуге къажау-къутхарыу эм иги бёлюмю» конкурсда, башхалагъа ал бермей, биринчи жерге чыгъады. 

Хасауланы Расул а быйыл женгил атлетикадан (1 километрге кросс) 1-чи жерге чыкъгъанды. 
Бёлюмню къуллукъчуларын байрамлары бла алгъышлай, мындан ары да борчларын тамамлауда жетишимле, жамауатны жанындан хурмет, саулукъ эм ырахматлыкъ тежейбиз.