«Фахмулу жаш тёлюбюз – миллетибизни тамбласы»

Яникой элни китапханасында «Кязимни окъуу» деген  республикалы эришиу ётгенди.  Анга эллени, шахарланы школларыны окъуучулары къатышхандыла.

Быллай эришиу Яникойда ючюнчю кере бардырылады, алай республикалы даражада уа - биринчи кере. Аны Яникойну бла Каменканы администрациясы эм Яникой элни иймамы Элеккуланы Хасан хажи къурагъандыла. Ишни къуралыулу бардырылыууна  Яникой элни жер-жерли самоуправление советини депутаты Аккайланы Жаннет да уллу къыйын салгъанын белгилерчады.

Эришиуге къатышханлагъа багъа бергенлени къауумуна уа «Нюр»  журналны баш редактору  Сабанчыланы Арипа (жюрини башчысы), КъМР-ни Жазыучуларыны союзуну правленини таматасы Байтуугъанланы Исмайыл,  Гуманитар тинтиулени Къабарты-Малкъар институтуну къарачай-малкъар фольклор бёлюмюню илму къуллукъчусу Локияланы Жаухар, Яникойну школунда орус тил бла адабиятдан  устаз Жолабланы Мадина,  элни китапханасыны таматасы  Аппайланы (Газаланы) Алима киргендиле. 

Сёзсюз, алагъа сайлау этген къыйын эди, болсада ала бирча ыразылыкъда Гран-приге Огъары Малкъарны 2-чи номерли мектебини окъуучусу Къазийланы Мансурну тийишли кёргендиле. Аны Кязимни «Атама» деген назмусун ариу эм жюрек  жылылыкъ бла окъугъанына ким да ыразы болмай къаллыкъ тюйюл эди. Мансурну конкурсха Занибекланы Карина хазырлагъанды.

Биринчи жерге уа Бызынгыдан Ахкёбекланы Алийхан чыкъгъанды.  Яникойну орта школуну окъуучусу Элмырзаланы Мариям а экинчи  болгъанды. Анга чыпчыкъны юсюнден сейир кёрмюч этерге болушхан, ариу окъургъа да юйретген устазы Хырхаланы Загиратны энчи белгилерге тийишлиди.

Ючюнчю жерни Экинчи Чегемни 2-чи номерли мектебини окъуучусу Урчукъланы Наиля алгъанды. Ол назмуну шатык, сабыр ауазы, хар сёзюне тамам ёз тилни энчиликлерин сингдире окъугъанды. Аны конкурсха устаз Байдаланы Индира хазырлагъанды.

Аладан сора да, беш сабий «Лауреатла» деген атха тийишли болгъандыла: Нальчик шахарны 33-чю номерли мектебини, кёп жаны бла окъутхан республикалы гимназияны,  14-чю номерли гимназияны окъуучулары Апполаны Амина, Алтууланы Мустафа, Геграланы Айла, Чегем шахарны 3-чю номерли мектебинден Жашууланы Эльмира, Шалушкада 1-чи номерли мектепден Сарбашланы Динислам.

Конкурсха къатышханлары ючюн Тёбен Чегемни мектебини, Чегем шахарны 5-чи номерли мектебини, Звёздный посёлокну мектебини окъуучулары Къудайланы Самира, Сарбашланы Рахима, Жолайланы Милана китапла эм грамотала бла саугъаланнгандыла.

Эришиуде айырмалы  болгъанланы, аланы хазырлагъан устазланы да Элеккуланы Хасан хажи да китапла, грамотала, майдалла, ахча бла да саугъалагъанды.

«Бюгюн биз бек  сыйлы жумушну тамамлагъанбыз, закий Мечиланы Кязимни аты ёмюрде да унутулмазлыгъына юлюшюбюзню къошханбыз. Анга жораланнган конкурсха эллерибизден, шахар школладан да бек фахмулу окъуучула къатышханлары къууандыргъанды. Аланы араларында бек игилени сайларгъа къыйын иш эди, болсада айырыргъа тюшгенди»,- деп, Элеккуланы Хасан эришиуге къатышханлагъа, аланы хазырлагъан устазлагъа,  жюрини къауумуна жюрек ыразылыгъын билдиргенди.

Кесини алгъышлау эмда насийхат сёзлерин Сабанчыланы Арипа да айтханды.  «Бу къыйын кезиуде билимигизни, заманыгъызны, кюч-къарыуугъузну да аямай, сабийлеге тилибизни, адабиятыбызны, маданиятыбызны билдирирге кюрешгенигиз ючюн сау болугъуз»,- дегенди ол, устазлагъа ыспас эте.

Окъуучулагъа уа ол былай насийхат этгенди: «Ана тилигизни билсегиз, битеу тюрк дуниягъа эшикле ачылгъанлай турлукъдула. Ала сизни, сиз аланы ангыларыкъсыз, адабиятларын, маданиятларын да билликсиз. Бюгюн биз эм игилени белгилерге кюрешгенбиз, алай мени нек сайламагъандыла деп, чырт кёлюгюзге тиймесин, барыгъыз да хунерлилесиз, алда сизни да хорламла сакълайдыла».

Конкурсха къатышханлагъа кесини ыспас сёзлерин, ыразылыгъын Къабарты-Малкъарны Жазыучуларыны союзуну башчысы Байтуугъанланы Исмайыл а: «Быллай сабийле болгъан къадарда, тилибизни, миллетибизни да тамблагъы кюню барды. Ана тилни сюйюу ананы сюйгенден башха болмайды. Тил миллетни ёзегиди. Тилсиз миллет сангырауду. Бизни тилибизни саулай дуниягъа эшитдирген закий Кязимча, Къайсынча адамларыбыз а миллет ёхтемлигибиздиле. Сиз бюгюн былайда кесибизни тилибизге, адабиятыбызгъа, маданиятыбызгъа да керти сюймеклигигизни кёргюзтгенсиз. Сау болугъуз», - деп, ёхтемленип айтханды.

Сёлешгенле барысы да закий Кязимни назмулары огъурлулукъгъа юйретген насийхат тизгинле болгъанларын белгилегендиле, бюгюннгю конкурс а, сёзсюз, сабийлени эслеринде, окъугъан назмулары жюреклеринде къаллыкъларын айтхандыла.