Жазыучуларыбызда – китап тапка

Бу кюнледе Нальчикде КъМР-ни Жазыучуларыны союзунда жазыучуларыбызны китап тапкасы ачылгъанды. Шимал-Кавказ регионда ол биринчи къуралгъанды эм анда  жангы китапла бла шагъырейленир онг барды.

Союзну таматасы Байтуугъанланы Исмайыл чертгеннге кёре, аланы баш муратлары кеси авторларыбызны чыгъармалары  окъулурча этиудю.

- Шёндюгю жаш тёлю асламында тыш къыраллы жазыучуланы окъургъа сюеди. Биз а, ол тёрени  тюрлендирип, кеси авторларыбызны жангы китапларына сурам болурун излейбиз. Жарсыугъа, жаш адамланы асламы малкъар, къабарты жазыучуланы билген да этмейдиле. Биз а ол кемчиликни кетерирге сюебиз, - дегенди Байтуугъан улу. 

Китап тапка бла шагъырейленир эм республикалы адабият бла байламлы къаллай жарсыула болгъанларын сюзер мурат бла анда КъМР-ни маданият министри Мухадин Кумахов да болгъанды. Ызы бла ол жазыучула бла «тёгерек столну» ишине къатышып, шёндюгюлю цифралы технологияланы кезиуюнде ала къалай ишлегенлерин эм не жангылыкъла сакълагъанларын сюзгенди.