Оюмларын ачыкъ айталгъан майдан

Къабарты-Малкъарны Жамауат палатасыны быйыл ахыр пленар жыйылыуунда аны ишини эсеплери чыгъарылгъандыла, келир жылгъа борчла салыннгандыла. 
Палатаны алтынчы чакъырылыуу быйыл биринчи жыл ишлегенликге, кёп жумушну тамамлагъанды. Аны башчысы Хазратали Бердов билдиргенича, 2025 жылда анда 5 пленар жыйылыу, Советни - 9, комиссияланы да 80 жыйылыулары болгъандыла, 4 башламчылыкъ жашауда бардырылгъандыла, 3 чыгъармачылыкъ эришиу къуралгъандыла, алагъа 1500-ден аслам адам къатышхандыла.

Энчи эс законопроектлени жамауат тинтиулерин тамамлаугъа бёлюннгенди, битеу да 74 республикалы эм федерал законну проектине  къаралгъанды, 14-сюню жамауат экспертизасы болгъанды. Палатаны келечилери ишлеринде Уллу Хорламны 80-жыллыгъыны эмда Ата журтну къоруулаучуну жылында туугъан жерге сюймекликни эм кертичиликни сезимлерин кючлеуге, тёлюлени араларында байламлыкъланы сакълаугъа къайгъыргъандыла. Аны чегинде ючюнчю республикалы «Содружество» деген форум къуралгъанды, анга Жамауат палатаны, хар муниципал къуралыуну, коммерциялы болмагъан биригиулени, къырал власть органланы келечилери, СВО-гъа къатышханла, дин ахлула чакъырылгъандыла. 

Кенгешле уа Ата журтха къуллукъ этиуде Граждан общество бла байламлыкъла тохташдырыугъа, миллетле аралы келишиулюкню сакълауну магъанасына, тёрели тин байлыкълагъа, адет-тёрелени юслери бла адамлада инсанлыкъ  жууаплылыкъны сезимин къураугъа жораланнгандыла. Хазратали Александрович чертгенича, 2025 жылны ичинде палатаны комиссиялары барысы да тёрели россейли тин-ниет хазнаны сакълау бла кюрешгендиле.

Миллет проектлени бла къырал программала къалай  толтурулгъанларына, власть органланы ишлерине жамауат контроль да тынгылы бардырылгъанды. Бу ишге жораланып, палатаны Совети жыйылыуларында гитче эм орта предпринимательствогъа себеплик къалай этилгенин, регионда жерлени тазалау не халда болгъанын сюзгенди. Жамауат контрольну  чегинде палатаны келечилери сабийлени жай солууларын тийишлисича къуралгъанын бла къалгъанын, мектепледе 1-4-чю класслада окъуучуланы аш-азыкъ бла къалай жалчытылыннганларын, муниципалитетле улутхачылыкъгъа къажау не тюрлю мадарла этгенлерин эмда районлада Жаш тёлю араланы ишлерин тинтгендиле.

Борчлу халда адамланы льготалы къауумларына дарманла хакъсыз берилгенлерине бла къалгъанларына, ёксюз эмда ата-аналары къарамай къойгъан сабийлени жашау журтла бла жалчытыу къалай толтурулгъанына кёз-къулакъ этилгенди.

Жамауат къараучу комиссияны ишине да Хазратали Бердов бийик багъа бичгенди. Ол белгилегенича, комиссия тюрмеледе тургъанланы  эркинликлери сакъланырча уллу ишни тамамлагъанды.

Жыйылыуда айтылгъаныча, республиканы Жамауат палатасы быйыл кёп жумуш тамамлагъанына районлада жамауат палатала да юлюшлерин къошхандыла. Ала, жер-жерледе адамланы жарсытхан затланы, аланы башламчылыкъларыны юслеринден дайым билдире, арада байламлыкъланы тутхандыла. Быйыл да, алгъын жылладача, Жамауат палата инсанла оюмларын ачыкъ айталгъан, айырмалы сынамгъа юйретген, власть органланы келечилери, экспертле бла жамауат ушакъ бардыргъан майдан болгъанды.  

Ызы бла толтургъан ишлерини юслеринден палатаны социал политика, саулукъ сакълау, физкультура эм спорт жаны бла комиссиясыны башчысы Наталья Шинкарёва, маданият, тин хазнаны сакълау эмда асламлы коммуникацияла жаны бла комиссиясыны башчысы Феликс Наков, Элбрус районну жамауат палатасыны башчысы Селяланы Азрет-Алий билдиргендиле. 
Жыйылыуда палатаны ишлеринде айырмалы болгъан келечилери ыразылыкъ къагъытла эмда грамотала бла саугъаланнгандыла.