Банк карталаны хайырланыу ёсгенди

Быйыл биринчи октябрьге шартлагъа кёре, Къабарты-Малкъарда кёп къалмай 1,7 миллион банк карточка чыкъгъанды. Бир жылны ичинде аланы саны алтмыш процентге кёбейгенди. Орта эсеп бла алып тергегенде, хар инсанны къолунда экишер картасы барды, дегендиле Россейни Банкыны бизни республикада бёлюмюнде.

Тёлеу карталаны алыу инфраструктура да айнып барады. Бизни регионда 429 банкомат ишлейди эмда 10,5 минг чакълы POS‑терминал хайырланылады; бир жылны ичине аланы саны бешден бирине кёбейгенди. Терминалланы сегиз мингден артыгъы товарла неда жумушла ючюн ахчаны QR‑код бла тёлерге амал бередиле.

Дагъыда регионда жашагъанла «кассада къолгъа ахча» амалны хайырланыргъа боллукъдула. Бу сервис адамгъа аберини багъасын тёлеген кезиуде кесини карточкасындан да ахча тешерге онг береди; сагъынылгъан кюннге республикада аллай 164 терминал ишлейди. Кёбюсю розница тюкенледе эмда отлукъ къуйгъан станциялада хайырланыладыла. Ол къайда болгъанын а кассада жазыу неда аны артында олтургъан ишчи билдирликдиле.

Тёлеу карталаны хайырланыу инфраструктураны кенгертиу – финансла жаны бла таплыкъны кючлендириу проектни борчларындан бирине саналады. Бизни республикада аны бла Россейни Банкыны бёлюмю, Правительство, кредит организацияла, связь операторла эмда районланы администрациялары кюрешедиле.