Предпринимательлени учуз кредитле бла онгдурадыла

Бизни къыралда предпринимательле быйыл МСП.РФ платформаны хайырланып, жыйырма миллиарддан аслам сом багъасына учуз кредитле къоллу болгъандыла. Алагъа ахча 8,5 процентге берилгенди, ол а банкланы ставкаларындан эки-юч кереге азды. Озгъан жыл бла тенглешдиргенде, быллай болушлукъну ёлчеми ючден бирине кёбейгенди, аны алгъанланы саны уа 16 процентге асламыракъ болгъанды. Къабарты-Малкъарда уа бу платформа бла 25 миллион сом берилгенди, деп билдиргендиле республиканы Экономиканы айнытыу министерствосундан.

«Аз ёлчемли займла гитче эмда орта бизнесге аламат келишедиле. Шёндюгю къырал программала бу амалны тынгылы эмда женгил хайырланыргъа онг бередиле. Энди «бир терезени» чеклеринде предпринимательле регионлада поручительство берген организацияланы оноуларын билдирирге, келишимге да онлайн-халда къол салыргъа боллукъдула. Аллай поручительствола бла 1,7 миллиард сом, электрон къол салыу бла уа 600 миллион сом берилгенди», - дегенди МСП Корпорацияны башчысы Александр Исаевич.

Берилген ахчаны тёртден бирин жумушла бла жалчытыу бёлюмде къармашхан предпринимательле алгъандыла. Сатыу-алыу бла кюрешгенле – 23, промышленность производствода ишлерин бардыргъанла уа  19 процентин жалчытхандыла.