Борчла сакъланмагъан «саугъа» болмаз ючюн

Юсюбюздеги жыл ахырына жете келгени бла байламлы, РФ-ни Сюд приставларыны федерал службаларыны КъМР-де управлениясыны «Жангы жылгъа борчсуз кир» деген ат бла акция бардыргъаныны юсюнден бизге ведомствону пресс-службасыны таматасы Баллиланы Алина билдиргенди.

- Бу акциягъа энчи предпринимательле бла бирге гражданла эм юридический бетле да къатышыргъа боллукъдула. Бу кюнледе приставла алиментледен, жашау журт-мюлк, административ тёлеуледе борчланы жыйыу бла тири кюреширикдиле. Кесигиз билгенликден, ол а адамланы мюлклерине арест салыу ишле бла байламлы болады. Аны себепли, башда чертилген жумушланы хар адам да кеси ыразылыгъы бла толтурса иги боллукъду, - деп чертгенди Алина Данияловна.

Керек консультацияны адамла жашагъан жерлерине кёре ведомстволу структуралада табаргъа боллукъдула. Адамланы жарсыуларына приставла геуюрге кюнледе 9-13 сагъатда эм орта кюнледе 13-18 сагъатда къарайдыла.

Андан сора да, акцияны чеклеринде рейдле бардырыллыкъдыла  эм адамла аслам жыйылгъан жерледе ала кеслерини борчларыны юслеринден тынчыракъ билирча энчи пунктла къураллыкъдыла. Алда кёпге созулгъан байрам кюнле боллукъларын эсге ала, адамла сакъланмай тургъан «саугъадан» кеслерин сакълар ючюн, бу жумушлагъа энчи магъана берилсе тийишлиди.

Борчугъузну болгъанын бла къалгъанын а РФ-ни Сюд приставларыны федерал службаларыны КъМР-де управлениясыны сайтында «Банк данных исполнительных производств» деген сервисде табаргъа боллукъду. Аны ючюн адамгъа анда жаланда кесини атын бла тукъумун жазаргъа керекди.  Дагъыда «Госуслуги» порталны «Сюдлю борчла» деген бёлюмюнде да къарар онг барды.

Сора «Полина» ауаз болушлукъчуну хайырлана, 88003330000 номер бла сёлешип, билир амал барды.