Студентледе ахчаны жюрютюуню юсюнден ангылаулары иги болурча

«Финтрек» деген проектни чеклеринде жангы окъуу семестр башланнганды. Ол Россейни Банкыны билим бериу башламчылыгъыды, кеси да финансла жаны бла хайырлы билим алыргъа себеплик этеди. Вебинарла жангыртылгъан онлайн‑платформада (https://fintrack.study) бардырыладыла.

Ара темаладан бири –жалгъан интеллектни (ИИ) ахчаны жюрютгенде хайырланыуду. Экспертле энчи бюджетни жарашдыргъанда, нейросетьлеге ышаныргъа боллугъуну юсюнден хапарларыкъдыла, жалгъан интеллект сферада шёндю къаллай финанс амалла чыкъгъанларын, жууукъ кезиуледе уа энтта да къайсылары боллугъун билдирликдиле.

Жангыртылгъан «Финтрек» студентлеге тап болурча жарашдырылгъанды. Анда хар дерс да 25 минутдан артыкъ бармайды. Материалланы барына да тынгыларгъа жарайды, сёз ючюн жолда, университетге бара туруп.

«Анга къатышхан хар кимни да ол сайтда кесини энчи кабинети барды. Анда аны жетишимлери, къайсы материалланы хайырланнганы, алгъан сертификатлары, боллукъ затла да кёрюнедиле. Сабийле кеслерини эсеплери бла шуёхларын да шагъырейлендирирге, финансла жаны бла окъуулулукъларын ала бла бирге кючлендирирге боллукъдула. Былтыр бу башламчылыкъгъа СКФО-дан къатышханланы саны бла (182) Къабарты-Малкъар экинчи жерни алгъанды», - дегенди Россейни Банкыны КъМР-де бёлюмюню башчысыны орунбасары Балаланы Расул.

Сагъынылгъан платформада бу проект бардырылгъан юч жылны ичинде жыйылгъан хар неда сакъланады: вебинарла, квизле, видеоподкастла, презентацияла эм башха материалла. «Финтрекни» хар семестри да жангы темаладан толу болуп барлыкъды – энчи бюджетден бла ахчаны аяулу жюрютюуден башлап, инвестициялагъа, налоглагъа, пенсиялагъа, хайырланыучуланы эркинликлерин къоруулаугъа дери. Окъуугъа карточкала, интерактивле, къошакъ тестле да себеплик этерикдиле.

Сертификат къоллу болур ючюн, талай видеогъа къараргъа, берилген дерслени тамамларгъа эмда ахыргъы сынам ишни тындырыргъа керекди.