Къоркъуулу эмда огъурлу жолоучулукъ

Ич ишлени подполковниги Биттирланы Ханифа аны бла  кёп жылланы бирге ишлеп тургъан, бюгюнлюкде уа энчи аскер операция баргъан жерде къуллукъ этген антлы нёгери Атабийланы Марианнаны жокъларгъа эрттеден бери да мурат этгенди.

- Ол 2023 жылны башындан бери да къазауат баргъан тийредеди.  Аллай бир заманны ичинде  бир кюннге да солуу алмагъанды, юйюнде болмагъанды.  «Хорлам бла Россейни байрагъын бийикге кётюрюп келгинчи, барлыкъ тюйюлме», -  деп жууаплайды соргъаннга, - дейди Ханифа мени бла ушагъында.

Марианна отставкадагъы полковникди. Энчи аскер операция башланнган биринчи кюнюнде окъуна, военкоматха барып, аны ары жиберирлерин тилегенди. Алгъа унамагъандыла. Болсада таулу къыз: «Кесим  барып къаллыкъма, къаллай ишден да артха турлукъ тюйюлме, менден гитчеле анда къан тёге тургъанда,  юйде къолларымы къучакълап олтуруп тураллыкъ тюйюлме», - деп, къаты болгъанындан сора, госпитальгъа  жибередиле. «Санитарка боллукъмуса?» - дегенлеринде, угъай демегенди. Сермеш аулакъладан жаралыланы сыртына кётюрюп аз чыгъармагъанды. Къаллай бирин ёлюмден къутхаргъанын санап чыгъар онг жокъду.

Жаралы солдатланы жараларын, аякъларын да жуугъанды. «Жаш аскерчиледен бири, аны билгенде, билемисе не айтханды: «Аякъларынгы полковник жуугъанды дегеннге бир заманда да ийнанырыкъ тюйюл эдим», - деп кюледи ушакъ нёгерим.

Бу кюнледе уа Ханифа, ишден солуугъа чыкъгъанлай,  Марианнаны жокъларгъа, башха аскерчилеге да жандауурлукъ жюк жыйышдырыргъа таукел болгъанды. Муратын эм алгъа КъМР-де ич ишле министри  Вячеслав Крючковха билдиргенди. Ол а  ишни барыу халына кеси кёз-къулакъ болуп башлайды,  орунбасары  Мурат Загаштоковха къолдан келген болушлукъну этерге  буюрады. Ол да, олсагъат бу огъурлу ишге Ич ишле министерствону  профсоюз организациясын да къошуп, ала да  кеслерини жанындан себеплик этерлерин тилегенди. Ханифагъа уа: «Алай  тебиреген эсенг, бизни атыбыздан да салам айт, саугъала да элт Марианнагъа, жаралы болуп жатхан жашлагъа да», - дегенди.

Алай бла Россейни КъМР-де Ич ишле министерствосу  машина бла бир жюк жыйышдыргъанды.

Ханифаны къазауат баргъан жерге гуманитар жюк бла тебирегенин Нальчикде 7-чи номерли мектепде кадет классда окъугъанла да эшитедиле. Ала да, СВО-да аскерчилеге жюрек ыразылыкъларын билдире, чакъырыу да этедиле. Анда былай айтылады: «Бизни багъалы солдатларыбыз, сау-эсен болугъуз! Хау, биз сизни танымайбыз, алай сизни бла ёхтемленебиз. Хар кюнюгюз, кечегиз да  тынчлыкъсыз болгъанын билебиз. Сиз а бизни ырахат жашауубуз ючюн жаныгъызны-къаныгъызны аямай къазауат этесиз, алгъа таукел бара, борчугъузну айыпсыз толтурасыз. Биз билебиз, сиз кючлюсюз, тюзлюкге ийнанасыз, биз да алайбыз эмда сиз хорлам бла къайтырыгъыгъызгъа толусунлай ийнанабыз. Сизге ышанабыз, сизни бла ёхемленебиз! Сюебиз эмда юйюлеригизге хорлам бла къайтырыгъызны сакълайбыз!»

Аны бла да чекленип къалмай, окъуу юйню директору Заур Харзиновну башчылыгъында устазла, сабийле, аланы ата-аналары да «ГАЗель» бла бир зат жыйышдыргъандыла. Машинаны къабыргъасына уа: «Энчи аскер операциягъа къатыша тургъан жигит жашларыбызгъа!» -деп жазгъандыла.

– Биз аны кёргенде, уллу сейирге къалгъанбыз, ол къадар затны къысха заманны ичинде  къалай жыйгъандыла деп, - дегенди Ханифа.Алай бла Биттирланы Ханифа, Марианнаны къарындашы Атабийланы Назир, эгечини жашы Беслан Докшукин, киеулери Артур Маков да юч  машина  бла жолгъа тебирейдиле.  Донецк, Луганск халкъ республикаладан, Мариупольдан, Бердянскден да ётюп, Мелитопольдан бир кесек арлакъда, Марианна къуллукъ этген эвакационный  пунктха  жетедиле.

– Анда, жер тюбюнде,  Марианна, башхала да бизге жарыкъ тюбейдиле. Келтирген жюклерибизни машиналадан къотарыргъа болушабыз, саламларыбызны да айтабыз, школчула жиберген письмоланы, чакъырыуну да беребиз,- дейди Ханифа.

Ол Марианнагъа сау-саламат тюбегенине къууанып, КъМР-де ич ишлени министрини орунбасарыны саламын да берип, анга, жаралы аскерчилеге да саугъаланы  Ич ишле министерствода къуллукъ этгенле, 7-чи номерли мектепни окъуучулары, устазлары, ата-аналары да жыйышдыргъанларын да айтханды. «Дагъыда РФ-ни МВД-сыны «Нальчик» управлениясыны таматасы Геграланы Марат сизни барыгъызгъа да къызыу салам айтдыргъанды. «Сен керти да жигит къызса, къыралны,  малкъар халкъны, республиканы  намысын эниш этмей бардыраса къуллугъунгу, мен сени бла ёхтемленеме!» -дегенди  Ханифа.

Марианна да ыспас сёзлерин бир да аямагъанды. «Хурметли, мен бек сюйген жерлешлерим, Къабарты-Малкъар Республикам,  кесим энчи, мында жараларына бакъдыра тургъан жашланы  атларындан да сизге  жюрек ыразылыгъымы билдирирге сюеме. Сиз жиберген ёрге жанла, эшилген чындайла, кёлекле, бёркле,  татлы затла, кёгетле да  жаралы солдатлагъа берилликлерине бир да ишекли болмагъыз»,-деп ышандыргъанды.

Жюкню жибергенлеге, аны келтиргенлеге  да бюсюреу сёзлерин  полкну командири, СВО-да «Макар» жашырын аты бла къуллукъ этген жаш да айтханды.  «Хорлам не заманда да тылдан башланады. Анда бизни ышаннгылы адамларыбыз болгъан къадарда, хорлам  бизники боллугъуна ишек жокъду. Бек сау болугъуз, школчула, устазла, ич ишледе, башха кюч  бёлюмледе  къуллукъ этгенле да бизге дайым  кёз-къулакъ болуп тургъаныгъыз ючюн», - дегенди.

– Жарсыугъа, ол тийреде кёп мычыр онг жокъ эди. Ол себепден Марианна къуллукъ этген жерде тургъаныбыз къысха болду. Жаралы жашлагъа саулукъ тежедик, жигит къызгъа  да кесин сакъларын тиледик. Сёзсюз, айырылыу бизге тынч тюйюл эди. Болсада, жууукъ заманда  къаугъа бошалып, жашларыбыз, Марианна да, кеси айтыучулай, Россейни юч тюрсюнлю байрагъын ёрге ёхтем кётюрюп, юйлерине келирлерине ийнаныуубуз кёл этдиргенди, - дейди Ханифа.

Аланы жолоучулукълары керти окъуна къоркъуулу болгъанына ма бу шарт да шагъатлыкъ этеди: ала жер тюбюнде, бункерде болгъанларында, башларында  автоматладан, топладан атдырыула  тохтаусуз эшитилип тургъандыла.
Бу кюнледе уа Черек районну Къашхатау элини арасында  уллу баннер орнатыллыкъды. Анда уа  Марианнаны сураты боллукъду эмда былай жазыллыкъды: «Россейни къоруулаучуларына махтау! Жерлешибиз, полицияны отставкада полковниги, аскерчи Атабийланы Азретни къызы Марианна бла ёхтемленебиз!»