Уллу жолну башында – махтау бла

Улбашланы  Магомет Огъары Малкъарда туууп ёсгенди, Созайланы Лязимат а  Акъ-Сууданды. Ала бир юйюр болуп  жашагъанлы быйыл беш жыл толгъанды. Эки жаш ёсдюредиле. Кёп болмай а  «Жылны юйюрю-2025» битеуроссей конкурсну регион кесегини «Жаш юйюр» бёлюмюнде  ючюнчю жерге чыкъгъандыла.

Юйюрню башчысы Магомет   Россейни Ич ишле министерствосуну Воронежде институтунда окъуп, «связьны инженери» усталыкъны алып чыкъгъанды. Бусагъатда полицияны  капитаны чында ич ишлени Нальчикде Управлениясында къуллукъ этеди.

- Атам Рамазанны айтханы бла сайлагъанма окъууну, сокъураннган да этмейме. Ол манга не жаны бла да юлгюдю. Бусагъатда  пенсиядады, алай ишсиз турургъа юйренмегени себепли терек бахча салып, аны бла кюрешеди. Анам Танзиля  уа Огъары Малкъарда участка больницада тамата медсестрады, - деп хапарлайды Магомет.

Лязимат а Пятигорскда медицина-фармацевт институтну бёлюмюн бошап, «провизор» усталыкъ алгъанды. Нальчикде Ленин атлы проспектде «Здравушка» аптекада ишлейди. Бусагъатда уа къагъанакъ сабийи бла болжаллы солуудады. «Медицинагъа жюрегим не заманда да тартханды, аны себепли усталыкъ сайлар заман жетгенде,  арсарсыз фармацевтиканы сайлагъанма», - дейди Лязимат. 

Аны атасы  Хусей а аш этиу жаны бла технологду, анасы Марина уа элде 15-чи номерли мектепде математикадан  устаз болуп ишлегенли онюч жылдан иги да атлагъанды. Къызына Лязимат деп да ол атагъанды. Ол аны эгечини аты эди.  Лязимат деген тюрк тилде  «хорламлы» деген магъананы тутады.

Эки юйюрде да таматала сабийлери билимли болурларына, усталыкъ алырларына уллу магъана бергендиле, анга тийишли онгла да къурагъандыла. Магометге бла Лязиматха   юйюрню  къалай багъаларгъа кереклисине, бир бирге  хурмет этерге, намыс-сый берирге кеслерини юлгюлеринде кёргюзтгендиле.

- Биз жашауну уллу жолуну башындабыз, бек  сюерик эдик аталарыбыз, аналарыбыз да  къатыбызда кёп жылланы сау-саламат турсала,-дейди Лязимат. Аланы жашау сынаулары, жюрек ачыкълыкъ, таза ниетлилик, жууаплылыкъ, тюзлюкге итиниу дегенча ышанлары бизге юлгю болуп келедиле, биз да аланы ёсюп келген сабийлерибизни юйретиуде хайырланыргъа кюрешебиз. Бек башы – ала бир бирге не заманда да сакъ болуп, къайгъырып ёсселе, билеклик этгенлей турсала сюебиз. Сёз ючюн,   тамата эгечим манга  ышаннгылы таянчакъ болуп тургъанды, мени   къоруулагъанды. Не жашырынлыгъымы да анга айтыучу эдим.  Ол а бир заманда   мени сатмагъанды, хыли этсем да, урушдурмагъанды, терсликни кеси боюнуна алгъанды,- деп хапарлагъанды Лязимат.

Ол Магомет бла къарындашыны тоюнда танышханды. Эки жылны ичинде  тюбешип тургъандыла, шуёхлукъ жюрютгендиле. «Аны ата-анасына къалай сакъ болгъанын бютюн бек  жаратханма. Ол аланы бек хурметлейди эмда ала ючюн бек къаты къайгъырады. Кеси да  ауур акъыллы, ийменчек, халал жюрекли, ангылаулу адамды. Жашларына да уллу эс бёледи. Таматабыз Алханнга тёрт жыл болады. Спортну бокс тюрлюсю  бла кюрешеди. Болсада шёндю балтырларын кючлендириу жаны бла жараула этеди. Аланны уа эки жылчыгъы толгъанды»,- дейди Лязимат.

Юйюр байрамланы  бирге ётдюрюрге бек сюеди. Сабийлени бек ашыгъып сакълагъан байрамлары уа – туугъан кюнлериди. «Бирини туугъан кюню болса, башхасыны да туугъан кюнюн да ол заманда белгилерге тюшеди, - деп кюледи Лязима. - Къонакъгъа уа жууукъларыбызны, шуёхларыбызны да чакъырабыз, сау кюнню барыбыз да бирге ётдюребиз».