Жылны эсеплери чыгъарылгъандыла, айырмалыла белгиленнгендиле

КъМР-ни Жарыкъландырыу эмда илму министерствосу кезиулю жыйылыуун  Чегем шахарны 3-чю номерли мектебинде   бардыргъанды. Аны ишине  КъМР-ни Парламентини Жарыкъландырыу, илму эмда жаш тёлюню ишлери жаны бла  комитетини таматасы Нина Емузова, КъМР-ни Башчысыны кенгешчиси Тюбейланы Альберт, МЧА-ны президенти, КъМР-ни Жарыкъландырыу эм илму  министерствосуну жамауат советини таматасы Хаути Сохроков,   республиканы  районларында  билим бериу управленияланы башчылары, окъуу юйлени директорлары, устазлары эмда башхала къатышхандыла.

Жыйылыуда  миллет проектлени бла регион программаланы толтуруу не халда болгъанларына къаралгъанды. Баш доклад бла КъМР-ни жарыкъландырыу эмда илму министри  Анзор Езаов сёлешгенди.

Ол билдиргенича, быйыл  министерство эки миллет проектни жашауда бардырыугъа къатышханды: «Жаш тёлю эм сабийле» эмда «Юйюр». Алагъа кёре иги кесек иш тындырылгъанды, ол санда мектеплеге тынгылы ремонт этиу, окъутуугъа эмда юйретиуге  керекли затла бла жалчытыу, устазланы болумларын игилендириу жаны бла да мадарла этилгендиле.

«Хар не иги затны да сабийлеге» деген проектни себеплиги бла уа  школланы иги кесеги жангыртылгъанды. 2025 жылдан 2027 жылгъа дери  дагъыда 70 мектепге ремонт этер план барды. Быйыл 15 мекямгъа ремонт этилип бошаллыкъды, ол санда  бешисине –эки жылны ичинде (2024-2025 жыллада).

Бюгюннге  Черек районну Зарагиж, Къашхатау,  Жемтала эллеринде, Прохладный шахарда, Солдатсткая станицада мектепле, Нальчикде 1-чи номерли  школ-интернат, 2-чи номерли лицей, 17-чи номерли мектеп, дагъыда 1-чи номерли энчи коррекциялы  школ-интернат да жангыртылып бошалгъандыла. Бешисинде уа ремонт ишле ахырына жетдириле турадыла.

Окъуу юйлени керекли оборудование, мебель, компьютерле эмда оргтехника, спорт  керекле да алыннгандыла, асламысы  «Къоркъуусузлукъну мурдорлары эмда Ата журтну къоруулау» деген дерслеге керекли оборудование бла да жалчытылгъандыла. Мектепледе «Иш (технололгия)» деген дерс бла байламлы методика арала къуралгъандыла.

Министр  «Устазла эмда насийхатчыла»  проектге кёре  директорланы кенгешчилерине, класс башчылагъа  иш хакъгъа деп къаллай бир ахча бёлюннгенин да билдиргенди. Ол айтханыча,   «Элли устаз»  программагъа кёре 9 устаз биришер миллион сом аллгъанды.

Кадрланы юслеринден айта, министр жангы устазла  8 мектепге келгенлерин билдиргенди. Ала  математикадан, орус тилден бла адабиятдан, ингилиз тилден, биологиядан устазладыла.

Докладда айтылгъаныча,«Профессионалитет» регион проектни чеклеринде эки общежитге тынгылы ремонт этилгенди.      «Юйюр» миллет проектни чеклеринде  «Юйюрге себеплик этиу» деген  регион проект бардырылгъанды.   Нальчикде  73-чю номерли сабий садха ремонт этилип бошалгъанды  эмда саусуз сабийле тургъан  арада ремонт ишле да бошала турадыла.

-Шахарларыбызны бла районларыбызны администрацияларыны башчыларына бизни бла  бирге хайырлы ишлегенлери ючюн ыспас этеме, аланы себепликлери болмаса эди, биз болдурулгъан жетишимлеге жеталлыкъ тюйюл эдик,-деп бошагъанды сёзюн министр.

Докладдан сора жыйылгъанла башхаланы сёлешиулерине тынгылагъандыла.

Ахырында хычыуун жумуш тамамланнганды. Устазланы, юйретиучюлени бир къауумларына  республиканы Жарыкъландырыу эм илму министерствосуну грамоталары, бюсюреу къагъытлары да берилгендиле.