«Бизни битеу ишибиз ёсюп келген тёлюню патриот ниетде юйретиуге бурулупду»

Бу кюнледе  Черек районда урушну, урунууну,  право низамны сакълаучу органланы, Сауутланнган кючлени  ветеранларыны (пенсиячыларыны) совети «Ата журтха ишлерим бла къуллукъ этеме» деген ат бла  инсанлыкъ форум бардыргъанды. Аны кезиуюнде Ата журтну Жигитини кюню да белгиленнгенди.

Жыйылыу районну Жаш тёлю арасында ётгенди. Кеси да  Ата журтну, аны мамыр кёгюн, къоркъуусузлугъун, деменгилилигин къоруулай, кишилик этгенлеге жораланнганды. Аны ишине район  администрацияны жууаплы къуллукъчулары,  депутатла, эллени башчылары, билим бериу учрежденияланы, мектеплени директорлары, маданиятда, китапханада ишлегенле, жамауат эмда дин организацияланы, Жаш тёлю араны келечилери, энчи аскер операциягъа барып келгенле да къатышхандыла.

Баш доклад бла уа  Черек районну Ветеранларыны советини таматасы Черкесланы Аллахбердини жашы Георгий сёлешгенди. Ол Уллу Ата журт урушну жылларында  немисли фашистлени ууатыугъа  Черек районда  жашагъанла да уллу къыйын салгъанларын чертгенди. 3500-ден аслам адам фронтха кетгендиле, аладан юйлерине жаланда бир кесеги къайтханды,  асламысы уа артда жараларындан сакъатлыкъ тапхандыла, дегенди.

«Юч жерлешибизге уа Совет Союзну Жигити деген сыйлы ат аталгъанды.  Уммайланы Мухажирни, Кубати бла Кабард Кардановланы атлары республиканы сыйлы мермер эсгертмесине жазылыпдыла, ала бизни акъылыбызда, жюрегибизде да ёмюрге къаллыкъдыла»,- дегенди докладчы.

Ол  Уллу Ата журт урушда кишилик этгенлени атлары да унутулмагъанларын,  ёсюп келген тёлюлеге ала  юлгю болгъанлай къаллыкъларын да чертгенди.

Андан сора Черкес улу ол башчылыкъ этген ветеран совет тамамлагъан ишле бла шагъырей этгенди. «Бизни битеу ишибиз жаш адамланы  патриот ниетде юйретиуге бурулупду. Ол мурат бла Жаш тёлю ара бла бирге Кишиликни дерслерин, Аскер махтаулукъну кюнлерин бардырыугъа къатышабыз, энчи аскер операциядан къайтхан жашла бла тюбешиуле да  къурайбыз»,- деп, тамата къайсы элледе къаллай тюбешиуле болгъанларыны юслеринден энчи тохтап айтханды. 

Уллу Ата журт урушну тарыхында Краснодонну комсомолчуларыны кишиликлерини юсюнден хапарларындан Бабугентни эмда Къашхатауну школларыны окъуучулары бла аууздан айтылгъан  журнал бардыргъандыла.  «МЕГАПИР» биригиу бла бирге Россей Федерацияны Жигитлери бла  тюрлю-тюрлю тюбешиуле, ингирле къуралгъандыла.  Окъуучула бла  Россейни Жигитлери Аркадий Корольков, Валерий Куков эмда  Сергей Тулин тюбешгендиле.

Аллай тюбешиуледен бирини кезиунде Россейни Жигитлери  Къашхатауну орта школуну арбазында «Эсде тутууну терек бахчасын» салгъандыла.

Андан сора да, Ветеранланы совети элни, районну да атларын айтдыргъан жерлешлерини юслеринден тийишли материалла жыйышдырып, Уллу Ата журт урушха, бусагъатда бардырыла тургъан энчи аскер операциягъа къатышханланы, тылда ишлегенлени барысына да энчи паспортла жарашдырыу ишни андан ары бардырады. «Бек ышанабыз, биз жыйышдыргъан уллу тизме Махтаулукъну музейинде кесине жер табарыгъына эмда   Эсде тутууну жууукъ заманлада ишленирик эсгертмесине жазыллыкъларына бек ышанабыз», - дегенди биригиуню таматасы.

Ол райондан Социалист Урунууну Жигитлерини атларын да эсгериуню дурус кёргенди. «Ол сыйлы атха бизни райондан  жетеулен тийишли болгъандыла. Аланы атларын да  Къабарты-Малкъарны Махтаулукъну аллеясына жазаргъа керекди»,- дегенди.

Черкес улу уруш отун жаш адамлагъа да сынаргъа тюшгенин айтып, интернационал борчларын толтура, Афганистанда  Черек райондан алтаулан ёлгенин да эсге салгъанды. Ала барысы да  Къызыл Жулдузну ордени бла саугъаланнгандыла, атлары уа Эсгериуню китабына алтын харфла бла жазылгъандыла, дегенди.

- Дагъыда 2005 жылны 13 октябринде бизни республикагъа келген бир къара кюнню да унутур амал жокъду. Террористлени бла экстремистлени  сауутланнган къаууму Нальчикге чабыууллукъ этгендиле. Аланы алларында уа  право низамны сакълаучула къалкъанча сюелгендиле, аланы тохтатыр эмда  мамырлыкъны сакълар ючюн кёпле жанларын бергендиле. Черек райондан да ол кезиуде тёртеулен ёлгенди,- дегенди докладчы.

Энчи аскер операцияны юсюнден айтханда уа, Черек райондан бусагъатда анда  300-ден аслам жаш къазауат этгенин билдиргенди. «Жерлешлерибизни арасында  жигитча сермеше ёлгенле да бардыла. Аланы ата-аналарыны алларында баш урама»,-деп бошагъанды сёзюн ветеран биригиуню таматасы.

Форумда дагъыда Зарагиж элни Ветеранларыны советини председатели Эдуард Калмыков, СВО-гъа къатышып къайтхан Мирзантланы Хадис,  Огъары Малкъарда  2-чи номерли мектепни  директоруну къуллугъун толтургъан Керменланы Рита, Зарагижде школну директоруну юйретиу иш жаны бла орунбасары Бегийланы Аннета, Черек районда администрацияны бёлюмюню таматасы Османланы Мухтар, районну администрациясыны башчысыны орунбасарлары Тереза Эфендиева эмда  Уяналаны Азрет да  сёлешгендиле.

«Ата журтха ишлерим бла къуллукъ этеме» деген форумну ахырында  Тереза Эфендиева Черкесланы Георгийге ол башчылыкъ этген жамауат биригиу ёсюп келген тёлюню  юйретиу жаны бла уллу да, магъаналы да  иш бардыргъаны ючюн ыспас этгенди.