Къонакъ юйлеге къошуллукъду

Быйыл Къабарты-Малкъарда туризм бла байламлы инвестициялы проектлеге 2,6 миллиард сом бёлюннгенди. Саулай алып айтханда, бюгюнлюкде республикада 621 къонакъ юй ишленеди. Былтыр бу заман бла тенглешдиргенде, ол 51 процентге кёпдю. Болсада жууукъ заманда бу жаны бла уллу къошумчулукъ этилликди: Минги тауну къыбыла жанында къонакъла ырахат солурча хар неси да болгъан «Sky Alliance Elbrus» комплекс орналлыкъды. Аны 64 отоуу, 200 адамгъа рестораны да боллукъдула.

Объектни къурулушуна 760 миллион сом къоратыллыкъды. Ол келир жылны ахырына хайырланыргъа берилликди.

Аны бла бирге чекленнген жууаплылыгъы болгъан «СОК “АЗАУ» биригиу да Азау талада спорт эм саулукъну кючлеу комплекс сюелтилинирикди. Проектге кёре къонакълагъа тёрт жулдузлу номерлери, рестораны, юч коттеджи, хамамы, комплекси эм башха затлары да боллукъдула. Аны къурулушу 2027 жылда бошаллыкъды.

Андан сора да, Азау талада 2028 жылда 120 адамгъа тёрт жулдузлу къонакъ юй ишленирикди. Анга да 2 миллиард сом къоратыллыкъды. Терс-Къолда да «Эльбрус. Поляна Азау» деген беш жулдузлу къонакъ юйю бла 2,2 минг адамгъа кёп функциялы комплексни къурулушу башланырыкъды. Аны администрацияны юйю, кёп функциялы эм жылы суулары бла комплекслери, 700 адамгъа ашханасы да боллукъдула. Объектни къурулушуна 18,2 миллиард сом къоратыллыкъды. Аны биринчи, экинчи къатларын 2026-2027 жыллада эм ючюнчю кесегин а 2028 жылда ишлеп бошарыкъдыла.

Дагъыда «Эльбрус» биригиу Азау талада 600 адамгъа тёрт жулдузлу къонакъ юйюню къурулушун башларыкъды. Ол 2028 жылны кюз артында хайырланыргъа берилирге керекди. 

Эсге сала айтсакъ, быйыл тогъуз айда Къабарты-Малкъарда 1 миллион 557 минг адам солугъанды. Ол, былтыр бу заман бла тенглешдиргенде, 9,4 процентге кёпдю. Болсада жууукъ заманда къонакъланы санын 2 миллионнга жетдирирге белгиленеди. Сагъынылгъан проектле уа анга ахшы къошумчулукъ этериклери баямды.