Бизнесни айнытыуну юсюнден баргъанды сёз

Кёп болмай Къабарты-Малкъар къырал университетде «Тири эм конкуренциягъа чыдамлы  экономика» миллет проектге кирген «Россей Федерацияны илму-технология жаны бла айнытыу»  федерал проектге кёре, сынамлы специалистле, бийик билим бериу программала жаны бла экспертле студентле бла тюбешгендиле.

 КъМКъУ-ну Технология  жангычылыкъла эм  билимни  тохтаусуз ёсдюрюу  жаны бла департаменти  быйыл жаш адамлагъа  къыйматлы проектлерин жашауда бардырыргъа  болушурча курсла ётдюреди. Ол санда  проектлери  хазыр болгъанлагъа «Сосруко»  эм  предпринимательлик сынауларын ёсдюрюрге,  проектлерин да жарашдырыргъа излегенлеге уа  «Азау» программала  бардыла.

КъМКъУ-ну преподаватели,  экономика илмуланы  кандидаты,  конституция эм  административ право  кафедраны  доценти   Карина Мамбетова студентле бла тюбешиуюнде бир жолгъа  устаз,   предприниматель болуп къалай  ишлегенини эм кесине да заман къайдан  тапханыны юсюнден хапарлагъанды. 

Ол айтханнга кёре, школда иги блим алырча, эм  биринчи ол кесине керек болгъанын сезерге керекди. Жерлешибиз МГИМО-да  юристге окъугъанды, аны бла бирге   тыш къырал тиллени  да билгенди. Билим алгъандан сора  лингвистика жаны бла кесини школун къурагъанды, биргесине ишлерге  сынамлы специалистлени да чакъыргъанды. 

Аны бла чекленип къалмай,  Нальчикде ресторан  ачханды. Карина Михайловна студентлеге аны къалай башлагъанын, бу жаны бла жетишимли болурча не этерге кереклисин айтып,  рестораторну тасхалары бла   шагъырейлендиргенди.

Бизнесмен жаш адамланы проектлерини иги кесеги къыйматлы болгъанларын да белгилегенди. Кёп зат адамны кесинден къалады.  Сёз ючюн, педагогика  колледжде  окъугъанла   репетиторла болуп ишлеселе,  къошакъ халда файда тюшюраллыкъларын эсгертгенди.

- Бирсиле бла эришмей, адам кеси иги болургъа итинирге керекди. Хар ким кесини хунерин ачыкъларгъа,  эринмей, аны айнытыргъа кюреширге тийишлиди,- деп къошханды Карина.

Ызы бла Хасанияны администрациясыны башчысы  Азаматланы Къайсын жаш адамлагъа кесини ишини  юсюнден айтханды. Бюгюнлюкде предпринимательлеге къыралны эм муниципалитетни жанындан къаллай болушлукъ этилгенинин, ёз элинде бардырылгъан проектлени юсюнден  да билдиргенди.  

- Бизни  эл туризм жаны бла къыйматлы жерди таукел айтырчады. Арт заманда республикада солугъан къонакъланы санына танг къошула баргъанын эсге алсакъ, туризм кластер   ахшы башламчылыкъды.  Аны бла байламлы элни къатында  тёшден лыжала, сноубордда, чанада  эм  башха затлада  учарча узунлугъу эки жюз метрге жетген жол къурар муратыбыз барды. Алай бла,  къолдан келсе,  аны экинчи  жылда окъуна ишлетип башларгъа  сюебиз.  Ол сабийле, уллула да зауукълукъ табарча аламат жер боллукъду. Аны бла бирге Нальчик сууну боюнунда да адамла солурча, ашарча  жерле къураллыкъдыла,- дейди Азамат улу.

Сбербанкны Къабарты-Малкъарда бёлюмюню корпоратив  клиентле бла ишлеген бёлюмню  таматасы   Азамат Шипшев да  республикада жетишимли ишлеген бизнеслени  тизмеси бла шагъырей этгенди.

- Ала эл мюлк,  промышленность, къурулуш   туризм эм медицина  алыкъынчы  бизде иги айнымагъан  IT-технологияла жаны бла  предпринимательство бла байламлыдыла. Алагъа ёнкюч ахча бергенибизден сора да, проектлерин ишлетирге болушабыз. Банкны специалистлери эсгертиуле бередиле, аналитика бардырадыла,- деп къошханды банкны келечиси.

Предпринимательстволукъ жаны бла программагъа къатышхан жаш адамла  кёп сейир проектле бла шагъырейленнгендиле.  Болсада  специалистле бла тюбешиулеринде ала эм магъаналы ресурс адам  болгъанын ангылагъандыла.  Нек дегенде командада  бирлик эм оноу эте билген тамата   болмаса, къайсы бир проект да къыйматлыгъын тас этеди.

Магометланы Сулейман.
Поделиться: