Алгъа чакъыргъан ахшы умуту – чемпион болургъа

Этезланы Алана Тырныауузда жашайды. Анга эм ариу каратечи къыз дерге боллукъбуз. Бусагъатда ол жашауун жаланда спорт бла байлар умутлуду.Алананы алты жылы болгъанда, асыры чёрчекден, спортха берирге келишедиле атасы бла анасы. Аны биргесине гитче эгешчиги Эльманы да бередиле. Алай бла ол, жарауланы жаратып, спортну бу тюрлюсюн сюйгенин ангылайды. Тырныауузда биринчи тренери Евгений Могилевец сабийни кёргенлей окъуна, кёл салса, жетишимли боллугъун ангылап, аны бла ишин къыстау бардыргъанды. Биринчи эришиулеге къатыша башлагъанында окъуна, аны техниканы тюз алып, хайырлана билгенин да эслейдиле судьяла.

Бир кезиуде сабийлени жарау этерге онглары кенг болур ючюн, юйюр Нальчикге кёчерге таукел болады. Мында аны тренер Азамат Мешев хазырлагъанды. Алана кеси салгъан муратына эринмей баргъаны себепли жетишимлери да бола тургъандыла. Тёрт жылны Нальчикде жашап, биягъы Тырныауузгъа къайтады юйюр. Бусагъатда уа къызланы Руслан Нахушев юйретеди.

Каратеде къызла кёпдюле. Баям, ол спортну саулукъгъа чып тюшерине къоркъуу аз болгъан тюрлюсю болгъаны бла байламлыды.

- Бу аны контактсыз тюрлюсюдю, аны себепли мен бек жаратама. Жарау этгенде, бир бирге къатылыргъа тюшеди, ол да приёмлагъа юйренирге кереклиси ючюндю, - дейди Алана.

Хар тутушха, тюбешиуге да къууанып барады каратист къыз. Аны алгъа чакъыргъан ахшы умуту барды. Ол да чемпион болургъады. Жашауунда эм хычыуун тюбешиуге Россей даражалы сермешлени санайды. Анда хорлагъандан сора, эришиуню призёру болуп, резервге тюшерик эди. Андан арысын кеси былай эсгереди:

- Мени бла онючжыллыкъ къыз чыгъады. Сермешде экибизни да эсеплерибиз бирча эдиле: 1-1. Тюбешиуню ахырына бир азчыкъ къалгъанда, ол мени бла сермешген къызны да бир баллы болгъанын унутуп, кесими хорлагъан сунуп, сермешни ахырына дери татамиден тышына къууанып чыгъама. Ол аллай магъанасыз хорлатыуум болгъанды. Артда, Россей даражада призёр болуп, 3-чю жерни алгъан эдим.

Алана хар тюбешиуюне энчи багъа береди. Ол айтханнга кёре, аны бла кюйюзге чыкъгъан хар бирине уллу хурмет эте биледи.

- Хар спортчуну биринчи жоругъу – биргенге чыкъгъанны сындырмай, хорлай, хорлата да билиудю. Бизни анга тренерлерибиз тохтамай юйретедиле. Хар заманда да сен сюйгенча болмайды. Бирде ауурлугъу сенича болгъанлыкъгъа, хунерлери бла усталыкълары башха болады, - деп хапарлайды Алана.

Хар эришиу да анга жетишимге элтген бир атламды. Анга билеклик этген атасы бла анасы къайры да эришиулеге тренерни биргесине боладыла. Ол а анга уллу кюч, кеси къарыууна ийнаныу береди.

Алана быйыл 9-чу классха барлыкъды. Жылны кезиуюнде эришиулеге кетгени ючюн, дерслени бир къауумундан къалыргъа тюшеригин эсге ала, жай айланы бошуна жибермей, къырал сынамлагъа хазырланыр ючюн, къошакъ билим халда устазлагъа жюрюйдю. Жашаууну усталыгъына уа кеси да тренерликни сайларгъа сюеди, алай, бирси жанындан а, врач боллугъу да келеди. Ким биледи, кеси сюйгенча болалса, химия-биология бёлюмню сайларгъа да угъай демейди. Юйде бошуна олтургъандан эсе, къыз кесини сейирине кёре айныгъанын тюзге санайды.

Карате бла кюрешгенлени араларында ол бек жаратхан, ёхтемленнген спортчуланы да сагъынады. Россейни жыйымдыкъ къауумунда дагъыстанлы спортчула Ахмед  Ахмедовну,  Эрнест Шарафутдиновну  жарауда бла сермешде къылыкъларына бек бюсюрейди.

- Хар адам да сайлагъан усталыгъында бийик жетишимлеге жетерге, алчы болургъа сюеди. Мен да тогъуз жылдан бери хар кюнден кёп сагъатны каратеге бергеним себепли бийик даражагъа итинеме, - дейди спортчу къыз.

Тренерини спортчулагъа халаллыгъын да бек жаратады. Ол хорламына къууана, къытдыргъанына уа жарсый да биледи. Андан сора да, татамиге чыкъгъанда, ол  бир жанындан къычыргъанланы бир да жаратмайды. Ала спортчугъа болушлукъ берген угъай, чырмагъан окъуна этгенин белгилеп айтады. Быйыл ол, кёп эришиулеге къатышып, къытхан, хорлатхан да этгенди.

Элбрусну кубогунда 2-чи жерни алгъан эди. Анда сермешле «тёгерек» халда бардырылып, алтын майдалгъа баллары жетишмегендиле. Спортну халкъла аралы классны устасы Аслан Кокаевни хурметине аталгъан эришиуде да экинчи болгъанды. Анда сермешлени ахшы ётдюргенди, алай финалда эсебине уа ыразы тюйюлдю. «ТЭС-ни кубогундан эки «алтын» бла къайтханды.

Россейни биринчилигинде, ачыулу халат жиберип, финал ючюн тюбешиуде къытдыргъанды. Аны эсге алып, доммакъ майдалны уа ычхындырмагъанды. Артда Алана жангы ауурлукъ къауумгъа - 47 килограммгъа - кёчгенди.

Мында биринчи эришиую Кавказ регионланы араларында «Best sport» болгъанды. Анда – экинчи, ызы бла уа «Кубок Пересвета» эришиуде уа ючюнчю болгъанды. Алгъаракълада Аслан Кокаевни хурметине аталгъан эришиуде бла Каспийни кубогунда алтын майдалланы алгъанды. Битеуроссей эришиуде бла «Best sport» эришиуню эсеплерине кёре спортну устасына кандидатны мардасын жетишимли толтургъанды.

Алана мындан ары да хар хорламын бла жетишимин кесини тукъумуна бла юйюрюне жораларгъа сюеди. Хар хорламы, алчылыгъы бла да малкъар халкъны атын иги бла айтдырыргъа итинеди.