Тёлюлени араларында байламлыкъланы кючлей

Журтубузну тарыхын, миллетлени адетлерин, ата-бабаларыбызны турмушларын ачыкълагъан эм кёп тин байлыкъны музейле сакълайдыла. Сейир экспозициялада бла кёрмючледе узакъ бурун ёмюрлени алада кёребиз. Тырныауузну Къулийланы Къайсын атлы Маданият юйюнде орналгъан краеведение музей жангызда Элбрус районну угъай, саулайда республиканы эм иги маданият учрежденияларындан бирине саналады. Анда кёрмючле бла экскурсияла бардырыладыла, тематикалы мероприятияла ётдюрюледиле, жарыкъландырыу эм юйретиу жумуш тамамланады.

Музейге Къабарты-Малкъарны бла Къарачай-Черкесни сыйлы артисти Отарланы Омарны аты берилгенди. Анда Отарланы тукъум келечилерини къатышыулары бла экспонатла, айтхылыкъ жырчы, къарачай-малкъар халкъ жырланы сакълаугъа уллу къыйын салгъан инсанны жашау эм чыгъармачылыкъ жолуну юсюнден фото-документальный материалла жыйылгъандыла. Андан сора сейир ишле да кёп болгъандыла, ол декоратив-къолдан чыгъармачылыкъны халкъла аралы фестивалына къатышханды, ол миллетлени тин байлыкъларын сакълар, ёсе келген тёлюлени къарачай-малкъар эпосха сейирин къозгъар  мурат бла къуралгъан эди. Х.М. Бербеков атлы Къабарты-Малкъар къырал университет бла фестиваль бардырырча проект жарашдыргъанды, аны ётдюрюуге Элбрус эм Черек районланы администрациялары бла культура управлениялары себеплик этгендиле. Фестивальны кезиуюнде жарыкъ концерт кёргюзтюлгенди, хорлагъанлагъа уа эсде къалырча саугъала берилгендиле. 

Жыл сайын тематикалы материалланы жыйыу жаны бла уллу иш толтурулады, белгили даталагъа бла адамлагъа аталып 30-гъа жууукъ кёрмюч – «Жерлешлерибиз – Сталинград сермешге къатышхан аскерчиле», «Барды аллай усталыкъ – Ата журтну къорууларгъа», «Таула тынгылайдыла. Алай эсде тутадыла», «Малкъар. Заманла эм ёмюрлюк…», «Ол бизге жырны саугъалагъанды», «Жерими адамлары», «Жигитлерибизге – махтау», «Россейни къырал белгилери» эм башхала – къураладыла.

Бери экскурсиялагъа жангызда школчула бла мында жашагъан адамла угъай, къыралыбызны жер-жерлеринден къонакъла да келедиле. Алагъа кёргюзтюр затла уа кёпдюле. Музейде эм аны Кёнделенде бёлюмюнде жети экспозиция зал барды, алада Уллу Ата журт урушха къатышхан аскерчилени юслеринден материалла бла сурат документле, районну айтхылыкъ инсанларыны, ол санда спортчуланы, Тырныауузну эм мындагъы вольфрам-магъадан комбинатны юсюнден шартла бардыла. Жолоучулагъа этнография эм Минги тауда жашагъан жаныуарланы юслеринден залла да сейирдиле. Биринчисинде - таулула бурун заманладан бери турмушларында хайырланнган затла, тарых эм маданият эсгертмеле, экинчисинде  жаныуарланы бла чыпчыкъланы бодуркъулары бардыла.

Жарыкъландырыу эм маданият ишни чегинде жарыкъландырыу, интерактив экскурсияла, тарых эм экология сагъатла, кишиликни дерслери, тылны, урушну сабийлери, белгили жерлешлерибиз бла тюбешиуле, интеллектуал эм оюн программала, адабият-музыка ингирле къураладыла. Андан тышында, жаш адамланы аскер-патриот халда юйретир, ала ариу ниетли болурча этер, республикабызны халкъларыны тарых эм маданият байлыкъларын сакълар муратда чыгъармачылыкъ проектле жарашдырыладыла. Алада  «Жигитлени эсгериуге жюрегинг бла къатыл», «Адамланы эслеринде къала», «Сейир къадарны адамлары», «КъМР-ни халкъларыны адет-тёрелери», «Табийгъат бла биз» -  миллетни, республикабызны да атын иги бла айтдыргъан адамларыбызны юслеринден билдиребиз. Музей ОТР каналны «Уллу къырал» рубрикасында Тырныауузну комбинатыны юсюнден, республиканы «МИР» каналда Боташланы Иссаны «Къушла бийикликни сюедиле» пьесасыны юсюнден бериулеге тюшгенди. Башкъортостан Республикада «Россейде излеу къымылдау» жамауат къымылдаугъа кишиликни дерслерин хазырларгъа эм аны видеогъа алдырыргъа болушханды. Ата журтну къоруулай ёлген жигитлерибизни атларын ёмюрлюк этиу «Заоблачный фронт» халкъла аралы аскер-тарых фестивальны ахыр кесегин бардырыргъа да болушханды. Жангызда былтыр музейге эм аны Кёнделенде филиалына 20 мингнге жууукъ адам келгендиле, 432 экскурсия, 9400 инсанны къатышыуу бла 138 мероприятие бардырылгъандыла.