Хорламны жолунда барыргъа юйретедиле

Спорт, маданият, санат, чыгъармачылыкъ…жашауну къайсы жанында да инсаннга жол кёргюзтгенден, усталыкъгъа юйретген насийхатчылары боладыла. Спортчулагъа ол насийхатчылыкъны тренерлери этедиле. Хар жетишимли гёжефни жанында неда команданы башында тренер турады, аны къыйыны чексиз уллуду. Ол, билимин, къарыуун аямай, сабийлени, абаданланы юйретеди, аланы фахмуларын айнытады, спортда бийик кёрюмдюлеге итиндиреди, алагъа жетерге да болушады. Сёзсюз, бу иш тёзюмлюк, кюч да излейди. Аны ючюн тренерле алгъыннгы спортчула боладыла, ала къыйын жарауланы, сермешлени кеслери ётгендиле эм жыйгъан сынамларын энди башхалагъа берирге, юлгю болургъа хазырдыла.  

Атларын айтдыргъан, республикаларына махтау келтирген фахмулу спортчулагъа Элбрус район къачан да бай болгъанды. Алагъа спортха жолну уа тренерлери ачхандыла. Эм уллу жетишимле, баям, 1996 жылдан башланадыла. Ол кезиуде Сергей Криваковский юйретген Аслан Губашиев, россейли каратечиледен биринчи болуп, дунияны чемпионатындан «алтынны» келтирген эди. Руслан Сижажев къыралны чемпионатларында хорлагъанды, Европаны эки биринчилигинде саугъаланнганланы санына киргенди, 2002 жылда уа Россейни эм иги каратечисине саналгъанды. Сергей Криваковский Тырныауузда спортну беш халкъла аралы устасын хазырлагъанды, анга «Россейни сыйлы тренери» деген ат берилгенди.

Элбрус районну олимпиада резервли спорт школуну ауур атлетикадан бёлюмюне жюрюгенле да кёп майдал къоллу болгъандыла. Анда 20 жылны ишлеген Россейни сыйлы тренери Маккаланы Махти эр кишилени, тиширыуланы да юйретгенди. Созайланы Мухаммат, Василий Половников, Геккиланы Таукъан, Ранета Карданова эм талай башха гёжеф районну ауур атлетикадан  тарыхына киргендиле. Энчи жерни анда Олимпиада оюнланы кюмюш эм доммакъ призёру, спортну сыйлы устасы Акайланы Хажи-Мурат алады. Тренер болуп ишлегенли Маккаланы Махти спортну сыйлы устасын, спортну халкъла аралы сегиз устасын юйретгенди.

Россейни сыйлы тренери деген атха грек-рим тутушуудан жараула бардыргъан Локияланы Юрий тийишли болгъанды, ол районну спорт школуна башчылыкъ да этеди. Аны эм фахмулу гёжефлеринден бири Заур Курамагомедов Лондонда Олимпиада доммакъ майдалны къытханды. Умутландыргъан спортчуладан бири Локияланы Жамболатды, ол Россейни чемпионатларында кюмюш эм эки доммакъ майдалла алгъанды, къыралны жыйымдыкъ командасыны санында Дунияны кубогунда экинчи жерге чыкъгъанды, аскерчилени араларында дунияны эки кере чемпионуду, талай даражалы халкъла аралы эришиулени призёруду. Жамболат келир Олимпиадагъа къатышыр деген ышаныу да барды. Локияланы Юрийни къолунда бусагъатда жарау этгенле да уллу жетишимле болдурургъа ушайдыла.    

Бюгюнлюкде районда беш спорт школда 60-дан аслам тренер ишлейдиле, ала 1500-ден аслам адамны юйретедиле. Арт кезиуде бийик кёрюмдюлери бла Этезланы Хусейнде бла Ибрагимде, Чеченланы Артурда, Балаланы Алимде, Хапаланы Асланда, Ачабайланы Музафарда, Малкъарланы Зейтунда (грек-рим тутушуу); Евгений Могилевецде, Руслан Нахушевде (карате); Чегембайланы Ахматда, Къумыкъланы Юсюпде, Гюлюйланы Маликде, Гергъокъланы Ахматда, Хаджиланы Тимурда, Балаланы Илиясда, Улакъланы Нурбекде (бокс); Этезланы Вадимде, Муаед Шаовда, Чингиз Дахкильговда (ауур атлетика); Курданланы Маратда (пауэрлифтинг) эм башхалада юйреннгенле къууандырадыла.