Эм тирилеге – саугъала

Росприроднадзорну башламчылыгъы бла быйыл 1 августда «Экология – хар кимни да ишиди» деген алтынчы халкъла аралы сабий-жаш тёлю саугъа ючюн конкурсну бардырыу башланнганды. Быйыл анга къатышырыкъла кеслерин онюч бёлюмде сынаргъа боллукъдула, ол санда «Экопроект», «Экомультфильм», «Экотуризм», «Зоомир», «Экоблогер» эм башхаларында. Хар бирини да энчи излемлери бардыла: эришиуге къатышырыкъланы жыл санларына, ала жарашдырыргъа керек затлагъа эмда тамамларгъа борчлу ишлеге кёре.

Алай бла, хорларгъа сюе эсегиз, экологияделокаждого. рф сайтха кирип, заявка беригиз. Онсегиз жыллары толмагъанлагъа анда энчи  кабинет къураллыкъды, ишлерин таматаланы неда педагогланы атларындан жиберликлеге уа «Насийхатчыны кабинети» боллукъду.

Эришиуледе хорлагъанланы эмда анга тири къатышханланы тюрлю-тюрлю саугъала сакълайдыла, ол санда Къара эмда Япон тенгизлени жагъаларына хакъсыз путёвкала, Халкъла аралы Байкал школда солургъа эмда окъургъа амал, телефонла, смартфонла, ноутбукла, «акъыллы» сагъатла, кийимле эмда башха затла. Дагъыда 150 чакълы вузгъа кирирге онгла, ЕГЭ-ге къошакъ балла, грантла да берилликдиле. 

Ашыгъыгъыз, заявкаланы келир жылда 1 апрельге дери аладыла.

Бу эришиу бардырылгъан талай жылны ичинде анга 320 мингден артыкъ сабий эмда абадан адам  къатышхандыла. Къуру Россейден угъай, токъсандан артыкъ тыш къыралдан окъуна. Сизни да аланы санында болургъа онгугъуз барды.