Къыш келди: иммунитетни къалай кючлендирейик?

Къышда кюн, витаминле жетмей, сууукъла тийип, къарыусуз болабыз. «Андан сора да, иммунитет, жыл сан келе-келсе, къарыусуздан-къарыусузгъа айланады, ол бегирек 50-55 жылдан сора эсленип тебирейди», - деп эсгертеди терапевт Магрелланы Келимат. Сора къалай кючлендирейик саныбызны – чархыбызны? Бу соруугъа жууап Магрелланы Келимат бергенди. 

-  Анализле бере – бере турургъа керек болур?

- Хау, жылгъа бир кере  бир ненча вирусну болгъанларына бла къалгъанларына анализле берирге тийишлиди. Иммунитетибизни бегирекда цитомегаловирус, вирус Эпштейна-Барр эмда герпеслени  тюрлю-тюрлюлери эгеп турадыла.

Тири халда инфекция табылса, вируслагъа къажау багъыу буюрурча врачха барыргъа керекди. Алай ол тири халда болмаса уа,  энишгеде сагъынылгъан амалланы хайырланнганлай туругъуз.

- Бал туз иммунитетни бузады  деген кертимиди?

- Хау, бузады. Сууукъ тийгенден, жыгъылып ачытханладан эмда эски  аурууладан сора да, санда – чархда воспаленияланы татлы, къууурулгъан ашарыкъла эмда тюкен къыймала къозгъайдыла.

-  Артыкъ семизлиг  а? Ала  къоруулаучу клеткалагъа чырмау этемидиле?

 -Керексиз жау воспаленияланы къозгъаргъа себеплик  этген затланы чыгъарады.  Андан сора да,  семизлик иммунный системаны  къоруулагъан  Т клеткалагъа жууаплы болгъан вилочковый безни (тимусну) ишлеуюнде чурумла чыгъарады.

- Ичгини юсюнден не зат айталлыкъсыз?

-Саулукълу эр кишиге кюннге  бир бокал чагъыр ичерге жарайды, тиширыугъа – аны жарымын,  ыйыкъгъа эки кюнню уа ахырысы бла да ичмей тёзерге тийишлиди  деген оюм жюрюйдю. Алай сан – чарх къарыусуз эсе, воспаленияла, эски ауруула, ичгинги не азы да иммунитетге хата келтиреди! 

Аракъы микробланы къырады дегенлик  ол  ётюрюкдю. Къыздырыучу ичги  чегилени хырыуларын иничкертеди эм къаннга андан бактерияла тынч ётедиле, ол а жангы воспаленияланы къозгъайды, иммунитетни къарыусузландырады.

Дагъыда бир затха эсигизни бурама: жукъугъузну урламагъыз! Жукълагъан заманда санда  – чархда бузукълукъла тапландырыладыла, воспаленияла  къурутуладыла, иммунный клеткаланы чыгъарыугъа жууаплы система  жангыртылынады. Аны себепли  абадан адамгъа  суткагъа  жети - сегиз сагъат жукъу керекди.