Бай тирлик алыннганды

Къабарты-Малкъарда быйыл биринчи он айны ичинде тахта кёгетледен 360,4 минг тонна  жыйылгъанды. Ол а былтырдан  иги да асламды, деп билдиргендиле республиканы Эл мюлк министерствосундан.

Тирликни  асламысы ачыкъ жерледе ёсдюрюлгенди. Орта эсеп бла бир гектардан жыйылгъаны былтыргъы 193,1 центнерден 235,5 центнерге жетгенди.

Быйылны ахыр эсеплери уа энтта да чыгъарылмагъандыла. Сёз ючюн, былтыр тахта кёгетледен битеу да 461,1 минг тонна  жыйылгъан эди.

Тёлеулеге къошуллукъду

Жашау этерге жараулу ахчаны эм аз ёлчеми Къабарты-Малкъарда 2026 жылда 6,88 процентге уллуракъ боллукъду. Тийишли оноуну республиканы Правительствосу бу кюнледе этгенди.

Алай бла энди 1 январьдан башлап ол былай боллукъду:

- адам башына – 20265 сом;

- уруннганлагъа – 22089 сом;

- пенсиячылагъа – 17428 сом;

- сабийлеге – 19657 сом.
Бу шартла республиканы бюджети къуралгъанда, социал тёлеулени, пособияланы, башха тюрлю болушлукъ ахчаны ёлчемлери тохташдырылгъанда хайырланыладыла.

Къарау

Республиканы Правительствосуну Председатели Мусукланы Алий алгъаракълада жангыртылгъан «Нальчик» спорт комплексде болгъанды. Анда кёп затха ремонт этилгенди: ичи, тышы, жылытыу быргъылары да тап халгъа келтирилгендиле. Ишчиле мекямны  терезелерин алышхандыла, чыракъла да орнатхандыла.

Ызы бла Алий Тахирович Хасаниягъа къайтханды. Анда уа жангы спорт комплекс ишлене турады. Къурулуш бардырыла тургъан жерге оборудование келтирилгенди, объектни бу айны жыйырма бешинде битдирирге дейдиле. Ол хазыр болса, анда къыркъ сабий жараула эталлыкъдыла.