Этден танг кесек сатылгъанды

КъМР-ни Эл мюлк министерствосундан билдиргенлерича, быйыл жылны башындан бери малланы бла юй къанатлыланы этлеринден  (союлмагъан ауурлукъда) эл мюлклени барысында да 42,6 минг тонна сатылгъанды. Ол, былтыр бу заман бла тенглешдиргенде,  20,5 процентге кёпдю.

Ол санда продукцияны иги кесеги, неда 35,1 тоннасы юй къанатлыланыкъыды. Тууарланы бла ууакъ малланы этлеринден да 5,4 минг эм 1,9 минг тонна сатылгъанды. Алай бла юч къауумда да былтыр бу замандан эсе иги ёсюм эсленеди.

Кюзлюкледе иги болум сакъланады

Белгилисича, «Россельхозцентр» учрежденияны Къабарты-Малкъарда бёлюмюню специалистлери эл администрацияланы  эм  мюлклени  келечилери бла бирге кюзлюклени болумларына кёз-къулакъ болгъанлай турадыла.

Быйыл республикада кюзлюклеге 66,5 минг гектар бёлюннгенди. Ол былтырдан 1,5 минг гектаргъа кёпдю. Бусагъатда тийишли ишле 63,6 минг гектарда неда 90 процентде тамамланнгандыла. Бирси жылладача сабанлыкъланы асламысында къылкъылыла ёсдюрюллюкдюле. Бюгюнлюкде кюзлюк будай - 47,5, арпа - 10,0 эм рапс 6,0 минг гектарда чачылгъандыла.

Россельхознадзордан билдиргенлерича, кюзлюкледе болум игилей къалады эм битимлеге къоркъуу салынырча шарт жокъду. Къылкъылыланы эрттерек орнатылгъанлары эки-юч чапыракъ жибергендиле, бирсиле да баш къусуп башлагъандыла. Ол санда къурт-къумурсха неда жукъгъан ауруу хата салгъан шарт тюбемегенди. Аны алайлыгъына уа жерчиликде къармашханланы тийишли ишлени тынгылы тамамлагъанларынадады, урлукъгъа сынамлы сортланы  хайырланнганларынданды эмда дараман салыннгандады.