Къонакъбайлыкъны белгиси

Чайны халкъла аралы кюнюне

15 декабрьде битеу дунияда Чайны халкъла аралы кюнюн белгилейдиле. Ол кюн жер юсюнде адамла бек кёп ичген суусапладан бирине – чайгъа - жораланады. Чайны адамла бек кёп жылланы ичинде сюйюп ичедиле: ол алагъа сууукъ кюн жылыныргъа болушады, стол артында ахлуланы, коллегаланы бютюн жууукъ этеди, бир-бир миллетлени адеьт-тёрелеринде уа  къонакъбайлыкъны белгисиди.

Чайны Индиядан, Шри-Ланкадан башлап, Къытайгъа, Кениягъа дери да кёп жерледе  ёсдюредиле. Алада миллионла бла адамла урунадыла. 15 декабрьде дунияны кёп къыралларында чайны татып кёрюуге жораланнган жыйылыула, кёрмючле, мастер-классла къураладыла. Алада хар адам да чайны жарашдырыуну жангы амалларына юйренедиле, аны жангы сортларындан хапар эшитедиле, чай бла байламлы адет-тёрелени  башхалыкъларын кёредиле.

«Чай суусапны кесген ичги болуп къалмай, миллионла бла адамланы миллет адетлерини жашауларыны бир  кесегиди. Бир-бир миллетледе, чайны тёгерегине жыйылып, аны ичгенни энчи адетлери терен заманладан келедиле. Сёз ючюн, къытайлылада чай ичерге жыйылып олтурууну тёрелеринде чайны сайлаугъа, аны къайнатыугъа энчи магъана бериледи. Алада чай адамгъа сый берилгенин кёргюзтеди, келишиулюкню белгисиди.

Индияда чайны юйюр бирге жыйылып, татлы ашарыкъла салып,  сют бла ичедиле. Мароккода чайгъа дугъума къошуп, бал тузну кёп салып бередиле къонакълагъа. Ол уллу сыйгъа саналады.

Ингилизлиле «afternoon tea» деген тёреге кёре, чай бла бирге тюрлю-тюрлю ашарыкъланы салып, ушакъла бардырадыла. Таулу миллетде да столгъа чакъыргъанда: «Чай иче бар… Кел, бир чай ич» деген сёзлени эшитирге боллукъду. Къалму4къ чай да таулуну столунда тийишли жерни ала барады.