Ахшылыкъ этерге ашыкъгъанлары бла айырмалыла

Бу кюнледе Нальчик шахар округну  жер-жерли администрациясында  волонтёрланы  саугъалагъандыла. Сау жылны ичинде магъаналы  жамауат проектлеге къатышхан, къарыусузлагъа болушхан, жаш тёлю башламчылыкълада да тириликлерин кёргюзтген жашлагъа бла къызлагъа  грамотала бла сертификатла берилгендиле.

Аланы шахар администрацияда Жаш тёлю политика жаны бла управленияны башчысы  Анзор Афашагов  алгъышлагъанды. Ол  бу къууанчлы жыйылыугъа  тири волонтёрла чакъырылгъанларын билдиргенди. Ала барысы да элли адам боладыла. «Ала болушлукъ керек болгъанлагъа   къолларын узатыргъа ашыкъгъанладыла, дунияны бютюн жарыкъ, иги  этерге  итиннгенледиле. Аланы араларында студентле, алыкъа мектепледе окъуй тургъан жашла бла къызла да кёпдюле. Ол  а бютюн къууандырады. Кесигизге хакъ, махтау да излемей,  къарыусузлагъа болушлукъ этерге хазырлыгъыгъыз  башхалагъа юлгюдю. Ёсюп келген тёлюню да ахшы ишлеге  кёллендиреди»,- деп, ол  волонтёрлагъа жюрек ыразылыгъын  билдиргенди, аны бла бирге уа ата-аналагъа, устазлагъа да  жууаплы инсанланы ёсдюргенлери эмда юйретгенлери ючюн ыспас этгенди. 

Ол кюн саугъаланнганланы араларында Хасанияда 16-чы номерли мектепни 10-чу классыны окъуучусу  Холаланы Далхат, Искусстволаны Шимал-Кавказ къырал институтундан  Виктория Макеева, Арина Бишенова, Даниил Мешвилиани, дагъыда башхала да болгъандыла.