Алмадан иги кесек сатылгъанды

Россельхознадзорну Шимал Кавказда управлениясыны Къабарты-Малкъарда  бёлюмюнден билдирилгенича, быйыл алмадан тирлик жыйылгъанлы  тышына  37 минг тонна сатылгъанды. Ол,  былтыр бу  заман бла тенглешдиргенде,  31 процентге кёпдю.  

Бюгюнлюкде бизни алмаларыбыз къыралны эллиге жууукъ регионуна   жибериледиле. Бу жол эм  уллу партияны  неда   10,2 минг тоннаны  Москва бла Москва областьла алгъандыла.  Андан сора да,  Санкт-Петербург шахаргъа  бла Ленинград областьха  2,8  минг тонна ашырылгъанды.   Дагъыда    Свердловск бла  Ростов   областьлагъа да  22 эм 1 минг тонна сатылгъанды.   Аны бирге быйыл биринчи кере сагъынылгъан продукциядан 18 тонна   Донецк Халкъ Республикагъа да жиберилгенди.

Эсге сала айтсакъ, продукцияны ашырырдан алгъа тийишли тинтиуле бардырыладыла. Экспертизаны эсеплерине кёре, саулукъгъа заран салырча эм  транспортировка этерге жарамазча шарт  табылмагъанды.