Бирикген, тири команда къуралгъанды

Бу кюнледе республикада «Биринчилени атламлары» сабий эмда жаш тёлюню регион бёлюмю кесини ючюнчю конференциясын бардыргъанды.  Быйыл  аны тизгинлерине 250 адам къошулгъанды.  Аланы араларында уа эм тириле, насийхатчыла,  жер- жерли бёлюмлени башчылары  да бардыла. Конференцияда  быйылгъы жылны ичинде  тамамланылгъан ишлени эсеплери чыгъарылгъандыла, мындан ары этилирге керекли борчла белгиленнгендиле. Жаш адамла бир бирге ишлеринден сынауларын да юлюш этгендиле.

Жыйылгъанланы аллында Россейни  сабийлерини эмда жаш тёлюсюню Къабарты-Малкъарда «Биринчилени атламларыны» регион бёлюмюню председатели  Аслан Шипшев  сёлешгенди.

-Бизни арабызда  бир затха да уллу кёллюлюк этмеген, къарыулу, хар нени да тамамларгъа къолларындан келген кадрла бардыла. Ма аллайладыла ахшы ишлеге ызларындан башхаланы элтгенле, тизгинлерине сюегенле да. Аллай жашладан бла къызладан юлгю ала, тенглери кеслерине жашауда жарарыкъ усталыкъ, жол да табадыла эмда алай бла тюз жолну сайларгъа юйренедиле.

   Сиз а ала, алгъа атларгъа, аллай тириле болургъа кюч-къарыу да къайдан табадыла деп сорургъа боллукъсуз. Мен а айтайым, алгъа барыуну  ачхычы бир ненча  женгил сёзден къуралады, аланы жаланда терк-терк эсге келтире къайтара турургъа керекди. Ала уа: «Сюймеклик, ачыкълыкъ, бир бирге  хурмет эте билиу,  адамлыкъ, керек заманда кимге да болушлукъгъа келирге ашыгъыу, уллу кёллюлюк этмеу, жууаплылыкъ, бола тургъан ишлеге тюз кёзден къарау, башха адамны къылыгъын, ниетин ангылаудула. Хау, сёзсюз, тюзлюк жанына къарап бир кесек къаты болуу, айтханындан таймау да керек боладыла, бир - бирледе аласыз да болмайды»,-дегенди Аслан  Мухамедович.

Андан сора да, ол  барыны да борчларыны юсюнден да айтханды. Ол чертгеннге кёре, къаллай ахшы ишни да  кеслери юйренип андан сора башхаланы  жорукълагъа кёре жашаргъа юйретирге, аны бла бирге уа бир -бир адамны эркинликлери бошалгъанда, башханы эркинликлери башланнганын да унутмазгъа  кереклисине  бургъанды жыйылгъанланы эслерин.

-Бизни борчубуз – кюн сайын да бир бирге хурмет эте, ангылай билирге, кёз-къулакъ болургъа  юйрениудю. Битеу ол затла уа  ахшы тёрелерибизни, адетлерибизни эсге алып, аланы чеклеринде тамамларгъа керекдиле.

Хар ким да кесини жеринде тутхан ишин жетишимли, бет жарыкълы бардырса, бизде хар зат да тап боллукъду,-дегенди «Биринчилени атламлары» регион жамауат организацияны председатели.

Сёлешиуле, предложенияла да берилип бошалгъандан сора, жыйылгъанлагъа концерт программа да кёргюзтюлгенди. Ахырында уа Аслан Шипшев конференциягъа къатышханланы барына да ыспас этгенди, жашла бла къызла уа председательни  ортагъа алып, «Биринчилени атламларыны» гимнин жырлагъандыла.