Аманлыкъчыла жууапха тартылгъандыла

Кёп болмай «Россети Северный Кавказ» – «Каббалкэнерго» биригиуню келечилери Урван районну Эски Урух элинде майнинг бла кюрешгенле эркинликсиз  электрокючню хайырланнганларын ачыкълагъандыла.   Саулай алып айтханда, ала 764 минг сагъат урлагъандыла, ахчагъа  кёчюргенде, ол 5,8 миллион сомгъа жетеди.

Рейдни кезиуюнде энергетикле эки тозурагъан жашау журт ток ызлагъа къошулгъанларын эслегендиле. Иги тинтип къарагъанларында, криптовалютала ишлеген  21 энчи майнинг устройство табылгъанды. Аппаратла  адам кёрмезча  фанерадан ишленнген  эм таууш этмеген орунда букъдурулуп тура эдиле.  Специалистле электрокючню эркинликсиз хайырланылгъанына акт жазгъандыла эм бузукълукъ этилгенин   ич ишлени органларына да билдиргендиле.                  

Жууукъ заманда аманлыкъчыла  РФ-ни Уголовный кодексини 165 -чи статьясыны 2 кесегени "б" пунктуна  тийишлиликде  жууапха тартылыргъа боллукъдула.
Саулай алып айтханда, «Россети Северный Кавказ» биригиуню келечилери  быллай бузукълукъланы ачыкъларча дайым эс бургъанлай турадыла. Нек дегенде  майнинг бла кюрешгенле  иги кесек ток къоратадыла эм аны бла   электрокюч ызлагъа бла подстанциялагъа уллу ауурлукъ саладыла.  Аны хатасындан энергообъектледе  аварияла боладыла.

Эсге сала айтсакъ, Россейни  Правительствосуну буйругъу бла быйыл биринчи январьдан башлап 2031 жылда  15 мартха  дери къыралны он регионунда  Къабарты-Малкъарда майнинг бла кюрешмезча чек салыннганды.