Тахта кёгетледен - бай тирлик

Шимал-Кавказстатны алгъадан этилген  эсеплерине кёре, Къабарты-Малкъарда бахчалад бла теплицалада тахта кёгетлени бар тюрлюсюнден  360,4 минг тонна тирлик жыйылгъанды.  Былтыр бу заман бла  тенглешдиргенде,  ол 17  процентге кёпдю. Тирликни иги кесеги неда  353,4 минг тоннасы тёрели бахчалагъа жетеди.

Орта эсеп бла алып айтханда, бир гектардан 235,5 центнер чыкъгъанды. Ол да бытыргъы кёрюмдюден 22 процентге мажалды.

Бюгюнлюкде тахта кёгетчилик битимчилик бёлюмде эм къыйматлыладан бирине саналады. Эсге сала айтсакъ, былтыр тюрлю-тюрлю тахта кёгетледен  422,2 минг тонна жыйылгъанды.
Бусагъатда районлада  эл мюлк производительле  статистика  управлениялагъа къаллай бир тирлик жыйгъанларын  билдирип бошамагъандыла. Алай бла жылны ахырына тахта кёгетчилик жаны бла  эсепле толусунлай чыгъарыллыкъдыла.