Россей Федерацияны Конституциясыны кюню бла алгъышлауу

Къабарты-Малкъар Республиканы Башчысы К.В. Коковну

Россей Федерацияны Конституциясыны кюню бла

АЛГЪЫШЛАУУ

Хурметли жерлешлерим!

Битеу жюрегимден сизни Россей Федерацияны Конституциясыны кюню бла алгъышлайма!

Бизни тарых, маданият эм адеп-къылыкъ къыйматларыбызгъа таяннган Баш закон Россейни къадарын белгилегенди, аны къыраллыгъыны, адамны эм инсанны эркинликлерин жалчытхан право системаны къуралыууну мурдорлу ызларын салып. 

Жангыртылгъан Конституцияда эм магъаналыгъа адамны ырахатлыгъы, сабийли юйюрлеге, тамата тёлюге болушлукъ саналады, ол а къыралыбызны социал жанына аслам эс бургъанына энтта бир ышаннгылы шагъатлыкъды. Россей Федерацияны Баш законунда магъаналы тюзетиуле къыралыбызны мындан ары айныууну ызын, бизни муратларыбызны эм борчларыбызны, заманны чакъырыууна бирлешип берген жууабыбызны, кесибизни сейирлерибизни, баш къыйматларыбызны эмда тёрелерибизни, - бизге багъалы болгъан хар затны, къорууларгъа хазырлыгъыбызны шарт белгилегендиле.

Конституциягъа таянып, аны къолайлыгъын жашаугъа кийире, биз къайсы къыйынлыкъладан да ётеригибизге, ёз Къабарты-Малкъарны бла Ата журтубузну игиликлерине деп салыннган борчланы толтурлугъубузгъа толу ийнанама.

Битеу жюрегимден сизге саулукъ-эсенлик эмда огъурлулукъ тежейме.