Аскерде болгъан кюнлерин эсгергенди

Аскер къаугъаланы ветераны Гелястанланы Барисбий РФ-ни Аманлыкъчыланы терсликлерине жолукъдуруу федерал службасыны 1-чи номерли следствие изоляторунда болгъанды. Тюбешиу Ата журтну Жигитлерини кюнюне аталгъанды. 

«Боевое братство» Битеуроссей жамауат организацияны регион бёлюмюню башчысы офицерлеге къуллукъ этген кюнлерини юслеринден айтханды. Отставкадагъы подполковник Гелястанланы Барисбий чекчи болгъанды, Чеченде къаугъагъа къатышханды. Бюгюнлюкде ол республиканы аскер комиссариатында ишлейди, жаш тёлюню Ата журтха сюймекликге юйретиу жумушланы толтурады. 

Тюбешиуде уа тарых кертиликни сакълауну магъанасыны, Ата журтну Жигитлерини кюнюню юслеринден айтхандыла. УФСИН-ни ишчи борчларын толтургъан кезиуде эм энчи аскер операцияда жоюлгъан къуллукъчуларын эсгергендиле, аланы батырлыкъларын хурметлегендиле. Ведомствону къуллукъчулары тюбешиуню ахырында Гелястанланы Барисбийге сейир ушакъ ючюн ыразылыкъларын айтхандыла.