Бютюнда уллу хата ёпкелеге салынады

Никотин адамны битеу санларын ууландырады, аурууланы асламы аны ючюн башланнганлары белгилиди.

 Бютюнда тютюнню хатасы коронавирус жайылгъан кезиуде ачыкъ болгъанды. Аны тартхан жаш адамланы кёбюсю бу жукъгъан аурууну къыйналып кётюргендиле. Абаданланы асламы уа женгил къутулгъандыла. Ол никотин адамны ёпкелерине келтирген заран бла байламлыды, дейди бизге КъМР-ни Саулукъ сакълау министерствосуну Психиатрияны бла наркологияны клиника арасыны бёлюмюню башчысы Хасан Хуштов.

 - Бу назик, къарыусуз зат акъылы болгъан адамны кесине къалай бойсундургъанына сейир этеме. Ахыр заманда уа электрон тютюнле кенг жайылып барадыла. Ол саулукъгъа заран салмайды деген хапар барды, алай ол ётюрюк болгъанын билирге керекди жамауат. Тинтиуледен сора тохташдырылгъаныча, вейпни къурамында болгъан химиялы затла адамны санларын ууландырадыла, бютюнда уллу хата ёпкелеге салынады,-дейди нарколог.

Ол айтханыча, тютюнню къойгъан адам санларында тазаланыу башланнганын бир сагъатдан окъуна сезип башларыкъды. «Таза солуу жашаугъа келтирген къууанчны ол заманда ангыларыкъсыз»,-дегенди ол ушагъыбызны ахырында.