Шахарчыланы къайгъысын кёрюп

Бу кюнледе Тырныауузда «Иги шахар болум къурау»  федерал проектге кёре кёп хайырланнган  жаяу жолчукъну тапландырырча мадар этилгенди, деп билдириледи КъМР-ни  Къурулуш эмда жашау журт-коммунал мюлк министерствосуну пресс-службасындан.

Сагъынылгъан жер былтыр тёртюнчю  битеуроссей конкурсну кезиуюнде тюзюнлей  къол кётюрюуде хорлагъанды. Анга  2,5  минг адам ыразылыкъларын билдиргендиле. 

Объект Элбрус проспектде Гирхожан сууну кёпюрюнден башлап кёп фатарлы юйге дери созулады.

Бюгюнлюкде ишлени асламысын бошагъандыла.  Ол санда жолчукъну мурдорун кючлеп,  бордюрла, плитка  салгъандыла, кече жарытырча чыракълы чыпынла да салгъандыла. Андан сора да, атлауучла болгъан жерде сакъатла эм арбачыкълада сабийлерин жюрютген анала да  къыйналмазча мадарла этилгендиле.