Жукъусузлукъдан къутулурча – тюз аш-азыкъ

Жукъусузлукъдан къыйналгъанла алай аз тюйюлдюле. Алай андан къутулур ючюн, дарман ичерден алгъа табийгъат берген амалланы  хайырланыргъа боллукъду. Илму тинтиуле ачыкълагъанларыча, ингирде не ашагъаныгъыз кече тынчлыкълы жукълагъаныгъыз бла къысха байламлыдыла.

Чархыгъызда магний аз эсе, жукълагъан къыйын боллукъду, сора кече терк-терк уянырыкъсыз. Аны хатасындан эрттенликде санларыгъыз, арыгъанча кёрюнюрюкдю. Бу халдан сакъланыр ючюн, кюнню ичинде къозла ашап кёрюгюз, алада магний бла жукъларгъа болушхан затла бардыла. Къозла адамны чархын ырахатландырадыла, аны хайырындан жукълагъан да тынч болады. Жатардан алгъа сют ичиу да ахшы амалды, ол эрттенликге дери уянмазгъа болушурукъду. Кёгетледен жюзюм бла бананла хайырлыдыла, алада тынчайтхан веществола байдыла. Чабакълада болгъан в6 витамин, пиринч да адамны чархында жукълатхан гормонну кёбейтирге себеплик этедиле.

Аз жукълагъан кёп ашайды. Мыйыны ауузланыугъа жууаплы кесеги терс ишлеп башлайды, аны хатасындан адам татлы, жаулу ашланы кюсейди, ызы бла ауурлулугъу мардадан кёп болады, терк арыйды. Аны ючюн алимле ингирде женгил азыкъла бла ауузланыргъа чакъырадыла, бютюнда инсан ауур ишледе неда кёп сагъыш этерге керекли жерледе уруна эсе. Башда сагъынылгъан ашладан сора да, ингирде гаккы, балли суу, жилек да хайырлыкъларын кёргюзтгендиле.