Ичгини хайырланыу азайгъанды

Озгъан эки айда Россейде ичгини хайырланыу иги да аз болгъанды. Ол эсеплени Бирикдирилген ведомствола аралы информация-статистика система туура этгенди. Анда айтылгъаннга кёре арт 8 айны ичинде бу кёрюмдю къыралны тарыхында 1997-98 жыллада тохташдырылгъан бек аз ёлчемге жете келгенди.

Алай бла ноябрьде Россейде сатылгъан ичгини ёлчеми адам башындан 7,63 литр болгъанды. Къырал даражада кёрюмдюле бла тенглешдиргенде, бютюнда аз ичги жюрюген регионла уа Шимал Кавказдадыла. Сёз ючюн, Чеченде бир адамгъа 0,11 литр болады. Ингушетияда андан бир кесек асламды - 0,63 литр. Дагъыстанда ол кёрюмдю 0,89 литрге жетеди. Ичгиге сурам аслам болгъан республикала уа Къабарты-Малкъар бла Къарачай-Черкесди. Бу эки субъектде адам башындан 2, 16 эм 2,59 литр жетеди. Болсада Москвадагъы эсепле аладан эки кереге асламдыла - 4,76 литр. Тинтиуле кёргюзтгеннге кёре алкоголь продукцияны аслам хайырланнган регион а Татарстанды. Анда кёрюмдю 8,27 литрге жете кетеди.

Жангы жылдан а ичгини багъасына да къошуллукъду. Бек учуз аракъыны багъасы 349-дан 409 сомгъа дери кётюрюллюкдю.