Россейни байрагъын кётюрлюкдюле

Дзюдону халкъла аралы федерациясы (IJF) россейли спортчулагъа къыралларыны гимни эм байрагъы бла чыгъаргъа эркин этгенди, деп билдириледи республиканы Спорт министерствосуну официал сайтында.

Федерацияда белгилегенлерича, дзюдо спортну, шуёхлукъну, мамырлыкъны, бир бирге хурмет этиуню багъалагъан тюрлюсюдю. 2022 жылны жаз башында IJF, Россейде бла Беларусьда битеу эришиулени календарьдан чыгъарып, бу къыралланы келечилерини уа байракъларын бла гимнлерин салыргъа эркинликлерин сыйыргъан эди. Ызы бла мартда федерация Россейни бла Беларусьну жыйымдыкъ къауумлары Дзюдону халкъла аралы федерациясыны бла Европалы союзну башчылыкъларында къуралгъан эришиулерине къатышмазлыкъларын билдиргенди. Россейни дзюдодан федерациясында ангылатханларыча, бу мадар спортчуланы къоркъуусузлукъларын жалчытыр муратда эмда къыйын тыш политика халла бла байламлы этилгенди.

2023 жылда IJF эки къыралны да келечилерине байракъсыз эм гимнсиз эриширге къойгъанды. 2024 жылны сентябринде россейли федерацияны башчысы Сергей Соловейчик Черногорияда Европаны чемпионатында спортчуларыбыз «акъ» байракъ бла угъай, IJF байрагъы бла чыгъарыкъларын айтханды.     

Алай бла IJF, спортну олимпиада тюрлюлерини федерацияларындан биринчи болуп, россейли спортчулагъа Ата журтларыны белгилери бла чыгъаргъа эркинликлерин къайтаргъанды. Аны бла байламлы оюмун республиканы спорт министри Ислам Хасанов билдиргенди. «Саулай къыралыбызгъача, бизге да ол ахшы, кёп заманны сакъланнган жангылыкъды. Нек дегенде, Россейни дзюдодан жыйымдыкъ къауумунда башха-башха жыл санлада республикабыздан жыйырмадан аслам адам тутушадыла. Атлетлерибиз къыралны ичинде, тышында, халкъла аралы эришиуледе да бийик жетишимле болдурадыла, жыл сайын юйрениу-жарау этиу жыйылыуланы ёте, жангы сынаулагъа хазырланадыла. Эм жууукъ заманда спортчуларыбызны хайыры бла Россейни байрагъы халкъла аралы даражада кётюрюлюрюне ийнанама», - дегенди ол.