Жаш тёлюню айныууна – аслам эс

Бу кюнледе редакциядан журналистле командировкагъа атланнгандыла. Бир хапар билейик деп, тау эллерибизден бирине, Быллымгъа, баргъандыла. Къаяла къучагъында орналгъан ариу эл. Ёзенлени алаша туман басып. Быллымгъа жете келген жерде уа ариу кюн тийип. Ол тийреге биринчи келген адам анга жомакълы  демей къоймаз.

Маданият юйлери элни ортасындады. Эки къатлы журт. Аны директору Байзуллаланы Жамиля жыйырма жылдан артыкъ ишлейди мында. Ишин биледи, тынгылы да бардырады.

Ол айтханыча, 2018  жылда миллет проектге кёре, мында уллу ремонт этилгенди. Ичи, тышы сюртюлгенди, боялгъанды,  эшиклери, терезелери, жылыу эмда суу быргъылары алышыннгандыла. 2023 жылда уа, ол да миллет проектге кёре, уллу отоуларына жангы шинтикле да келтирилгендиле. Ичи, тышы да бек тизгинлиди.

Мында кружокла ишлейдиле. Алагъа сабийле дерследен сора келедиле,  жырларгъа, тепсерге юйренедиле. Аланы  Тилланы Борис юйретеди. Ол къобузчу къыз Озарукъланы  Раузат бла Тырныаууздан жюрюйдю. Ыйыкъгъа юч кюн келип, къызчыкъланы, жашчыкъланы тепсетедиле. «Баллы» деген тепсеу къауумлары да барды.

Маданият юйде шёндюгю тепсеулени кружогу да барды. Аны уа Хаджиланы Марина бардырады. Ол да ишин иги билген устазладан бириди. Россейни Байрагъыны кюнюнде бу кружокга жюрюген жыйырма бир  сабий орус миллет кийимледе тепсегендиле. Ананы кюнюне аталгъан концертде уа сахнагъа къолларына жюрек суратла алып чыкъгъандыла. Къарагъанла аланы да узакъгъа созулгъан къарсла бла ашыргъандыла.

Сабийлени жырларгъа уа Хасан Шерхов юйретеди. Ол да Тырныаууздан жюрюйдю. «Инжичикле» деген жыр къауумлары да барды. Хасан юйретген жашла, къызла тюрлю-тюрлю эришиулеге къатышадыла, баргъан жерлеринден алчыла болуп къайтадыла.

Ахматланы Айшат а «Теремок» деген театр кружокну бардырады. Ары да жыйырмагъа жууукъ сабий жюрюйдю. Тюрлю-тюрлю жигитлени рольларын ойнаргъа юйренедиле. Андан сора да, аланы  Айшат назмула айтыргъа юйретеди.

Диналаны Салим, 20-жыллыкъ жаш, кеси ыразылыгъы бла «Миллет байлыкъ» деген  кружокну бардырады. Иш кёллю жашды. Россейни байрагъыны, Малкъар халкъны байрагъыны кюнюнде, халкъыбызны байрамларында да сабийлени  миллет кийимлери бла эл тийресинде таулагъа чыгъарып, видеола алдыргъанды.

Жылны кезиуюнде кёп байрамла боладыла. Ол кюнледе жырларгъа, тепсерге, ойнаргъа юйреннген сабийле фахмуларын кёргюзтедиле. Алгъаракълада, Ананы кюнюне атап,  байрам болгъан эди. Анга шёндю СВО-да болгъан быллымчы жашланы аналарын чакъыргъан эдиле. Жашчыкъла бла къызчыкъла аланы алларында назмула, жырла айтып, къууандыргъандыла.

Айны ортасында  Ата журтну къоруулаучуну жылыны жабылыуу боллукъду. Андан сора уа декабрьни ахыр кюнлеринден биринде Жангы жылгъа аталгъан концерт кёргюзтюллюкдю. Шёндю сабийле алагъа хазырлана турадыла.

Бу кюнледе уа Быллымгъа аты  айтылгъан «Балкария» тепсеу къауум да келген эди. Аны тепсеулерине къараргъа кёп адам жыйылгъанды, ала  концертден зауукълукъ тапхан эдиле. Сабийле уа артистле бла суратха да тюшгендиле.

Аллай тюбешиуле миллет культурабызны айнытыугъа уллу себеплик этедиле.

Быллымны Маданият юйюнде къаллай жумуш этиле эсе да, бийик даражада ётдюрюледи. Ол барысы да директору Байзуллаланы Жамиляны эм анда ишлегенлени да борчларын тынгылы толтургъанларыны  хайырларынданды. Алайды да, Быллымны Маданият юйю замандан артха къалмай бардырады ишин.