Токну къалай аяргъа боллукъду?

Кёпле электрокюч ючюн келген квитанцияны кёргенлеринде, хайырланыуну къалай азайтыргъа боллукъду деген сагъышлагъа къаладыла. Анга не мадар этерге боллукъду? Ол соруугъа «АиФ. Здоровье» газет жууаплайды.

Ёчюлтюрге унутмагъыз!

Аны билмеген хазна адам болмаз. Алай специалистле быллай амалгъа да юйретедиле: тёрели чыракъланы орунуна токну иги да аягъан светодиодланы салыгъыз. Ала токну он кереге аз кюйдюредиле. Тюкенледе дагъыда энергияны аягъан чыракъла сатыладыла. Ала да хайырланыучуну бохчасында къоранчланы азыракъ этедиле. Алай эсигизде болсун: быллай чыракъланы багъалары бир ненча кереге уллуду.

Алайды да, токну аяр ючюн, бек алгъа, аны керексиз кюйдюрюп турмауду, артыкъ уллу кючю болмагъан чыракъланы хайырланыуду.

Аш биширилген ток печь бар эсе

Сиз аш-азыкъ хазырлагъан кезиуде быллай печьле киловаттланы аяусуз кюйдюредиле. Аны себепли адырланы этиллик азыкъгъа кёре тюрлюлерин хайырланыргъа кюрешигиз, артыкъ уллусун алмагъыз. Дагъыда аш хазыр болургъа бир беш-он минут къалса окъуна, плитаны ёчюлтюрге боллукъду.

Токну аяусуз кюйдюргенле

Аллай техниканы арасында биринчи жерни холодильник алады. Нек дегенде ол кече-кюн да ишлегенлей турады. Дагъыда быстыр жууучу машина, итиу эм ток чайник къоранчланы эм азы бла ючден бирин этедиле. Анга не амал?

Холодильникден башлайыкъ. Аны плитадан узагъыракъда орнатыргъа кюрешигиз. Бирле быллай техниканы энчи шкафха саладыла. Ол терсди; жылыуда холодильник бютюнда аяусуз ишлейди, токну да анга кёре кюйдюреди. Дагъыда аны ичин азыкъдан тыкъ-тыкъма этмегиз. Бузу болса, ёчюлтюп, эритип, тазаларгъа унутмагъыз.

Быстыр жуууучу машина

Хар кийимни энчи кесин жуууп турмай, машинаны ичи толуракъ болурча аллай бир быстыр жыйылгъандан сора ишлетигиз. Алай аны ичин оздуруп толтурургъа да жарамайды. Къыйналып ишлеген машина токну да артыгъы бла хайырланады. Быстырланы жуугъанда, сууну иссилигин 40 градусдан артыкъ этмезге кюрешигиз. Дагъыда (аллай амал бар эсе) машинаны къысха программаларын хайырланыгъыз.
 

Чайник

Мында аяуну мадары бирди – аны ичин дайым тазалап турургъа. Алай болса, суу да терк къайнайды, ток да аз кюеди.

Итиу

Бек къургъакъ неда аз мылы болгъан быстырлагъа итиу салгъанда, аслам ток къоратылады. Аяулу итиу салыргъа керек болгъан кийимлеге приборну ёчюлтгенден сора аны къалгъан иссилиги да жетерикди.
Ток чыбыкъны розеткадан айырыгъыз

Юй техниканы кёп тюрлюлери ишлемегенликге, токну кюйдюрмеген сунмагъыз. Ала розеткагъа къошулуп болсала, аз-аздан электрокючню хайырланнганлай турадыла. 

Сёз ючюн, телевизор «жукълагъан» заманында бир айны ичинде тогъуз киловатт ток кюйдюреди. Башхала да андан артха къалмайдыла. Магнитофон жети эм компьютер юч киловатт «ашайдыла». 

Специалистлени айтханлары алайды: техника хайырланмай эсе, ток чыбыгъын розеткадан айырыгъыз. Бир жаны бла ол сизге электрокючню аяргъа себеплик этерикди.