Фатарны ортакъгъа бериуню юсюнден

Кёпле фатарларын башхалагъа ортакъгъа берип, андан файда кёредиле. Бир жаны бла алып къарагъанда,  аны хатасы жокъду, адам онгуна кёре башына мадар этерге кюрешсе. Алай бу жумушну келишимсиз этгенде уа, чурумла чыгъаргъа боллукъдула. Нек дегенде  бош адам фатарны ичинде аберини тапсыз этсе, бузса, хата салса, андан ол къоранчны багъасын тыйгъан къыйын болургъа боллукъду. Андан тышында уа, тазир да тёлерге. Аны себепли быллай затланы официальный халда тамамласа игиди, дегендиле Къабарты-Малкъарда МФЦ-да.

Фатарны ортакъгъа бериу амалла:

- Аны аллыкъла бла келишим къурап, налог декларацияны жарашдырып, 13 процент НДФЛ-ни жыл сайын тёлерге (жыллыкъ файда беш миллион сомдан артыкъ болса уа  15 процент);

- Энчи предпринимательча эсепге туруп, сайлагъан амалгъа кёре налог тёлерге (женгил халда алты процент тёлеп неда патент алып);

- Кесинг иш къурап къармашхан инсанча эсепге турургъа. Ортакъ тёлегенден тёрт процентин налогга берирге тюшерикди. Алай фатарны энчи предприниматель неда предприятие эмда организация ала эселе уа, сёз ючюн, командировкагъа келген адамларына дейик, ол алты процент боллукъду.

Келишимни регистрациясын къалай этерге керекди:

- Росреестрни сайтында. Къагъытланы онлайн халда бергенде,  эки жанындан да электрон къол салыу изленирикди;

- МФЦ-да. Бу амалны сайлагъанда,  приёмгъа жазылып, белгиленнген кюнде ары документлени да алып барыргъа тийишлиди.

Келишимни регистрациясын этерча быллай документле изленирикдиле:

- Фатарны иесинден неда аны ортакъгъа аллыкъ инсандан къырал эсепге тургъанларыны юсюнден заявление;

- Экисини да паспортлары. Бу жумушну башха адамны атындан тындыргъанлагъа уа - аладан доверенность;

- Ортакъгъа алыу келишим (анга ненча инсан къатыша эсе да, аллай бири);

- Къырал пошлина тёленнгенини юсюнден квитанция. Инсанлагъа ол 4 минг сомду.