Керти болгъан ётюрюк

Гитче сабийле ётюрюк айтыргъа юйренселе, сейирден сейир затла къурап барадыла. Кеслерини жашауларын жомакъладача этерге кюрешип, бир бирге болгъан затланы бютюн сейирсиндирирге, сора болмагъан затланы къурагъан ишде усталыкъларын хар кюнден кётюрюрге кюрешедиле.

Бизни хапарда да эки гитче жашчыкъ – Алим бла Ислам - кимни жашауу бютюн сейирли болгъанын билирге кюрешгендиле.

- Мени уа анам хар эрттенликден уллу тортла этеди! – деди Алим.

- Сеники тортла этгенликге, мени юйюмде тенгиз бла шоколад барды! – деп жууаплады Ислам.

- Аны жууаргъа къыйынды! Аны ючюн бизге ненча сюйсек, аллай бир шоколад келтиредиле! – къытдырыргъа унамады Алим.

- Неси къыйынды? Юйюбюзню жыйгъан адамла бардыла, мени атам алагъа хар кюнден ачха береди!

- Юйню жыйгъан адамламы дейсе? Бизде юй кир болса, жангы юйге кёчюп къалабыз! – деп кюлдю Алим.

- Да хау, сизге кёчерге тынч болур. Мени атамы асыры кёп машинасы болгъандан, аланы кёчюрюп айланнган алай тынч тюйюлдю, ол бек кёп заманны аллыкъды! – биягъы жангы зат Исламны эсине келди.

- Машиналаны жерде ташымай, хауада самолет бла элтирге керекди. Алай сен аны къайдан биле болурса, юйюгюзде къуру машинала бар эселе! – деп терк жууаплады Алим.

Ингирге дери болмачы затланы къурап, сермешдиле жашла, сора, битеу башларына келген затла бошалып, юйлерине атланыргъа таукел болдула. Алай Алим, ахыр сёзню Ислам айтханнга ёпкелеп, жангы зат къурар ючюн, сагъышлагъа кетди.

- Билемисе! – деп къууанды ол, бир жангы сейир зат къурап, – Мени атамда уа кюмюш чачлары бардыла!

Ахыр сёзню аны бла Алим кесине алды. Ол ахыр сёз а, аны атасында чал чачлары болгъанындан кертиден узакъ да тюйюл эди.