Тазалыгъы эмда къоркъуусузлугъу ючюн – къырал белги

Быйыл Къабарты-Малкъарда «Жашау этерча  инфраструктура» миллет проектге кёре, эллеге элтген  жолланы 21 километрине тынгылы ремонт этилгенди, деп билдириледи КъМР-ни Транспорт эмда жол мюлк министерствосуну пресс-службасындан. 
Тапландырыу ишлени кезиуюнде   «Дейское - Тёбен Курп» эм Шимал Осетия бла чекде Тёбен Курп бла   Шитхала эм Морзох жолланы 12 километри жангыртылгъанды. Аны бла бирге «Эски Черек - Жемтала - Сукан-суу» жолну 6 километри эм  Октябрьское элге элтген "Нальчик - Майский" жолну да 3,6 километри  шёндюгю излемлеге келиширча болгъандыла.   

 Андан сора да, «Биринчи Лескен - Огъары Лескен – Ташлы-Тала – Хазнидон» жолну да   3,1 километри игилендирилгенди.  Аны кезиуюнде Ташлы-Таланы Ленин атлы ара орамына да тынгылы ремонт этилгенди. Анда школ, сабий сад, фельдшер-акушер пункт, администрация, почта дегенча  социал магъаналы объектле орналадыла. 

Жолчула жолну мурдорун кючлегендиле, жауун саркъырча быргъыла эм арыкъла да салгъандыла, ызы бла  къалын асфальт да  жайгъандыла. Хар замандача, къоркъуусузлукъгъа энчи эс бурулгъанды: кече жолла, орамла да жарыкъ болурча мадарла этилгендиле, темир буруула тартылгъандыла, жорукъ белгиле бла ызла да салыннгандыла  эм башха жумушла да тындырылгъандыла.

- Жолгъа ремонт этилирин  иги кесек жылны сакълагъанбыз. Энди  мектепге жюрюген сабийлеге  къоркъурча тюйюлдю,  машинала да  сыйдам жол бла барырча  болгъандыла.  Саулай алып айтханда, эл жангыдан жашнагъанды,- дейди элде жашагъан тиширыуладан бири.  

Ведомстводан билдиргенлерине кёре, быйыл эллеге элтген жолланы  план  бла белгиленнген кесеги жангыртылып бошалгъанды.
Аны бла бирге сагъынылгъан кезиуде  «Экинчи Чегем - Булунгу», «Майский - Урожайное»,  «Нальчик - Майский» эм «Биринчи Лескен- Огъары Лескен - Ташлы-Тала - Хазнидон» жоллада саулайда  681 метрде 14 кёпюр   ишленнгенди.  
Эсге  сала айтсакъ, сагъынылгъан миллет проектге кёре, республикада  2019-2025 жыллада 36 кёпюр жангыртылгъанды.