Баш къайгъырыулары – айырыула чырмаусуз ётерча этиу

2026 жылда айырыу кампанияны чегинде Москвада Президент грантланы фондуну себеплиги бла жамауат къараучуланы биринчи битеуроссей конгресслери болгъанды. 
Анда къыралны битеу регионларындан 700-ден аслам инсан жамауат эсеплеуню бардырыуда, информация къоркъуусузлукъну жалчытыуда сынамларыны юсюнден айтхандыла, ишлерине жангы амалланы сингдириуню юсюнден оюмларын билдиргендиле.

Аны «Таза айырыула ючюн» майданны таматасы, Россейни Жамауат палатасыны Жамауат контроль эмда инсанланы тарыгъыулары бла ишлеу жаны бла комиссиясыны башчысы Алена Булгакова бардыргъанды. 

 Жыйылгъанлагъа алгъышлауларын Президентни Администрациясыны башчысыны орунбасары Сергей Кириенко бла Ара айырыучу комиссияны башчысы Элла Памфилова жибергендиле. Президентде Граждан обществону айнытыу эмда адамланы эркинликлери жаны бла советни келечиси «Жалынчакъсыз жамауат эсеплеу» ассоциацияны башчысы Александр Брод белгилегенича, бюгюнлюкде жамауат контрольну бардырыу граждан обществону айныгъаныны шартыды.   

Конгрессге республикабызны келечилери да къатышхандыла, аланы араларында устазла, маданият къуллукъчула, администраторла, коммерциялы болмагъан организацияланы ишчилери да бардыла, ала барысы да айырыулада жамауат къарауну бардыргъандыла эмда тестлени ётгендиле. Республиканы къауумуна башчылыкъны Жамауат палатаны аппаратыны таматасы Анна Дьяченко этгенди. Конгрессге къатышхан Абайланы Оксана айтханнга кёре, жыйылыу къайсы даражада да айырыуланы ачыкъ эм тийишлисича болурларыны мурдорларындан бири жамауат къарау болгъанын кёргюзтгенди. «Эм алгъа, конгресс шуёхлукъ халда ётгенин, барыбыз да кесибизни профессионал къауумну келечилерича сезгенибизни белгилерге керекди. Хар бирибиз да сагъышларыбызны, оюмларыбызны ачыкъ айталгъанбыз. Бютюнда уа Жамауат къараучуну кюнюн белгилерге эмда конгрессни мындан арысында ол кюн бардырыуну юсюнден оюмну жаратханма», – дегенди.

Регион къауумну келечиси Радмила Мажагова билдиргеннге кёре, пленар жыйылыудан сора конгрессге чакъырылгъан 700-ден аслам адам беш секцияда ишлегендиле, алагъа интерактив борчла салыннгандыла, тинтиуле болгъандыла, сора ала айырыуланы юсюнден видеороликле да алдыргъандыла. Эм магъаналы уа, ол оюм этгенден, жалгъан хапарлагъа бла билдириуге къажау туруууна амалланы излеу болгъанды.

Залина Хапова эс бургъаныча, конгресс журтубузну сюйген, аны къадарына уллу кёллю, болмагъан адамланы жыйгъанды. «Спикерледен бири - Россейни юристлерини биригиулерини башчысы Владимир Груздевни жамауат къараучула граждан обществону эм тири къаууму болгъанларыны юсюнден айтханын тюзге санайма. Ким биледи, ала айырыулагъа кандидат халда къатышырча заман келсе уа», - дегенди ол. Алибек Молов белгилегеннге кёре, конгрессге келгенлени араларында жаш адамла аслам болгъандыла. Республикабызны къауумуна орта эсеп бла жыл саны 35 жыл эди. Бу ишге жаш тёлюню тири къатышдырыуну юсюнден эсгертиуле терк-терк этилгендиле, ол излемге кёре, биз алчыланы санындабыз, деп къошханды Молов. Юлия Чиж жамауат къараучулагъа кёз къарам иги жанына тюрленнгенине къууаннганын, алагъа участкада жангыз да дежурныйлегеча угъай, граждан жашаугъа тири къатышхан адамлагъа къарагъанларын чертгенди. 

Жыйылгъанла конгрессни жыл сайын бардырыргъа эсгертиу этгендиле, ахыр пленар жыйылыуда ол къабыл кёрюлгенди, деп билдиргендиле республиканы Жамауат палатасындан.