Эки закийге баш ура

Ата журтну къоруулаучуну жылын эмда Уллу Ата журт урушда Хорламгъа 80 жыл толгъанын белгилеуню чеклеринде КъМР-ни Жамауат палатасы фронтчу назмучулагъа – Къулийланы Къайсыннга бла  Алим Кешоковха  жоралап «Биз тау жырны эки къанатыбыз» деген башламчылыкъларын туура этгендиле. Анга Къабарты-Малкъар къырал аграр университетни энчи орта билим бериу бёлюмюню келечилери да къатышхан эдиле, деп билдиргендиле вуздан.
Биринчиден, ала Къулий улуну бла Кешоковну назмуларын окъугъандыла, ызы бла Къайсын  туугъан   Эл-Тюбюнде къуралгъан «Ташда китап» деген эсгертме комплексде болгъандыла.

Ол а, барыбыз да билгенибизча, ташладан къаланнган бийик эмда кенг къабыргъады, таулуланы къурулушда къол ызларын эмда тёрелерин ачыкъ кёргюзтеди. Анга сыйдам мермер ташла орнатылып, юслеринде Къайсынны жюз назмусу жазылыпдыла.Къабыргъа Жылгъы сууну жагъасы бла ёрге, назмучуну юйюне дери созулады.

Студент къауум Къулийланы Къайсын «Къыш болгъан эди», «Жорт, жорт, гылыуум», «Сюймеклик ёмюрлеге къалады», «Адам. Къанатлы. Терек» чыгъармаларын жазгъан юйю-музейинде да  болгъандыла. Ала эки назмучу жюрютген шуёхлукъну юсюнден да ушакъ этгендиле. Ары барыргъа болушханлары ючюн университетни башчыларына эмда факультетни оноучуларына да ыразылыкъларын билдиргендиле.