Бу жол Ирина Бекуловагъа жетген болмагъанды

Кёп болмай Къабарты-Малкъар къырал университетде «Мисс КБГУ -2020» деген тёрели  конкурс бардырылгъанды.   Тиширыуну ариулугъун, билимин, къылыгъын,  фахмусун  ачыкълагъан  эришиулеге бу жол право, экономика эм философия, жангы гуманитар, финансла эм  менеджмент институтну, медицина эм педагогика колледжлени келечилери, саулай  алты къыз    къатышханды.

Къараучула   Элина Макоеваны, Камила Шогенованы, Карина Балованы, Татьяна Ахмедованы, Фатима Бееваны эм Ирина Бекулованы да сахнада номерлерин бек жаратхандыла. Къызла кийим тикгенден усталыкъларын, кенг билимлерин, чыгъармачылыкъ жаны бла хунерлерин да кёргюзтгендиле. Эм биринчиден кёзге  аланы хар бири да иги хазырланып  келгенлери  эслене эди.   

Жюриде уа республикада эм тышында  да белгилиле: журналист, телеведуший Теппеланы Ахмат, КъЧР-ни сыйлы артисткасы Татьяна Третьяк эм музыкант Атмир Шетов олтургъандыла.

Ахырында чыгъарылгъан  эсеплеге  кёре, Элина Макоева «Мисс шарм», Камила Шогенова «Мисс подиум», «Карина Балова «Мисс грация», Фатима Беева «Мисс элегантность», Ирина Бекулова «Мисс обаяние» эм Татьяна Ахмедова «Мисс конгениальность» даражала бла саугъаланнгандыла.    

Андан сора да, Камила  Шогеновагъа   къураучула  бегиракъ бюсюрегенлерине приз берилгенди,  Татьяна Ахмедовагъа  вице-мисс берилгенди.  Конкурсну баш саугъасына,  «МиссКБГУ-2020» деген атха уа  Ирина Бекулова тийишли болгъанды.