Эски мектепни орнуна – жангысы

Терс-Къолда "Жангы школ" федерал проектни чеклеринде 150 окъуучугъа  мектепни къурулушу барады, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан. 

Элде эки къатлы школну мекямы 1960 жылда ишленнгенди. Алгъа мында къурулуш управление орналгъанды, ызы бла общежит болуп тургъанды. Алай бла онеки жылдан сора аны мектепге жарарча жарашдыргъандыла. Алай ол, эски болгъаны бла бирге, билим бериу учрежденияладан изленнген мардалагъа да келишмегенди. Аны себепли элни ортасында 7300 квадрат метрде эрттеден бери бош тургъан спорт комплексни орунуна жангы мектеп салыргъа оноу этгендиле. Анга федерал бюджетден 155 сом бёлюннгенди.   

Бюгюнлюкде аны биринчи эм экинчи блокларында да экинчи къатысына дери конструкцияларын хазырлап, ичлеринде эм тышларында да къабыргъаларын къалап бошагъандыла. Бусагъатда башларын жабып, терезеле салып, ток чыбыкъла, кир суулагъа  быргъыла тартып эм башха жумушланы тамамлап кюрешедиле.

Спорт зал орналгъан ючюнчю блокда да ишчиле къабыргъаланы къалап, башлары бла бетон къуйгъандыла. Жууукъ заманда башын жабып башларыкъдыла. Окъуу юйню арбазы да айбатландырыллыкъды. Ол санда футбол, баскетбол ойнаучу эм тренажёрлары бла жараула бардырыргъа майданла да къураллыкъдыла. 

Эсге сала айтсакъ, ишлени башлардан алгъа, тийишли тинтиуле этилгендиле. Аны бла бирге къурулуш ишле жангы мардалагъа келиширлерине эм тынгылы материалла да хайырланырларына республиканы Тынгылы ремонт бардырыу жаны бла управлениясы дайым кёз-къулакъ болгъанлай турады. 

Планнга кёре, мектепни къурулушу быйылны ахырына бошалыргъа керекди.