Къулийланы Къайсыннга Тюркде эсгертме ачылгъанды

Кёп болмай Тюркню Анкара шахарыны Кечиорен районунда Къулийланы Къайсынны атын жюрютюрюк паркда   закийни таш суратын ачыуну къууанчы ётгенди. Анда сёлеше,  Россейни Тюрк Республикада посольствосуну башчысыны къуллугъун толтургъан Алексей Иванов  Къулийланы Къайсын миллетини эм жарыкъ жулдузу болгъанын чертип айтханды. «Ата журтуну тамаша табийгъаты, миллетине сюймеклиги аны  поэзияны битеудуния хазнасына кирген назмула жазаргъа кёллендиргендиле», - дегенди. 

 Къулий Къайсынны таш суратын РФ-ни Художниклерини союзуна кирген суратчы эм скульптор Ахматланы Леуан жамауатны тилеги бла эм КъМР-ни Маданият министерствосуну себеплиги бла  былтыр  ишлегенди. Аны айтхылыкъ поэтни  къарындашындан туугъан Къулийланы Малик бла Ахматланы Леуан ачхандыла.

 Ол къууанчха келген къонакъланы араларында  Россейни  дипломатлары эм муниципалитетленн келечилери да болгъандыла.  Жыйылыудан сора ала барысы да дуниягъа белгили поэтни эсгертмесини аллында суратха тюшгендиле.

 Эсгертиу: Къулийланы Шууаны жашы Къайсын 1966 жылда  М. Горький атлы къырал адабият саугъаны Россейде биринчилени санында алгъанды, 1967 жылда уа анга «Къабарты-Малкъар Республиканы халкъ поэти» деген сыйлы ат  аталгъанды. 1975 жылда ол СССР-ни Къырал саугъасыны, 1989 жылда уа (ёлгенден сора) Ленинчи саугъаны лауреатлары болгъанды.

 Къайсын Уллу Ата журтха да къатышханды. Аны  чыгъармалары 140  тилге кёчюрюлгендиле.

 Магометланы Сулейман хазырлагъанды.