Мектеплени ашханалары – айырмалыланы къауумунда

Арт кезиуде Къабарты-Малкъарны билим бериуюнде ишлегенле да аны бла байламлы бардырылгъан эришиулеге къатыша, жетишимли да бола келедиле. Аллай эришиуледен бири уа  «Эм ахшы мектеп ашхана» деген Битеуроссей  даражалы конкурсду. Ол  кёп болмай Ленинград областьны Гатчина шахарында озгъанды.

Алай бла ол быйыл бешинчи кере бардырылгъанды эмда аны эсеплерине кёре Гран-приге Краснодар крайны бла Ленинград областьны школлары тийишли болгъандыла. Къабарты-Малкъардан а Урваньны 5-чи номерли мектебини бла Басханны школуну къауумлары лауреат даражагъа чыкъгъандыла. Андан тышында да, Басханны мектеби «Хорламгъа талпыныулукъ ючюн» деген диплом бла да белгиленнгенди.

Эришиуню ишине РФ-ни жарыкъландырыу министрини орунбасары Ирина Шварцман къатышханды. Ары жыйылгъанланы алгъышлай, Ирина Владимировна мектепледе аш хазырлаучула, ол жаны бла устала этген ишни магъанасын, сабийлени саулукъларына жууаплылыкъ асламысында алада болгъанын да айтханды.

Конкурсну чеклеринде «Школ ашхана-окъуучуланы саулукълу аш-азыкъларыны экологиялы системасы» деген ат бла Битеуроссей илму-практикалы конференция да бардырылгъанды. Къабарты-Малкъардан баргъан келечиле  анга да къатышхандыла.